ഇന്ത്യയ്ക്കും വലിയ സ്വപ്നങ്ങള്‍ കണ്ടുകൂടേ’: ‘5 ട്രില്യണ്‍ സമ്പദ്വ്യവസ്ഥ’യില്‍ സംശയമുന്നയിക്കുന്നവര്‍ക്ക് മറുപടി നല്‍കി പ്രധാനമന്ത്രി

വാരാണസി: ഇന്ത്യയെ അഞ്ച് ലക്ഷം കോടി മൂല്യമുള്ള സാമ്പത്തിക ശക്തിയാക്കുമെന്ന ബജറ്റ് പ്രഖ്യാപനത്തെ കുറിച്ച് വിശദീകരണവുമായി പ്രധാനമന്ത്രി നരേന്ദ്ര മോദി. വാരണാസിയില്‍ നടന്ന ബിജെപി അംഗത്വ വിതരണ പരിപാടിയില്‍ സംസാരിക്കുകയായിരുന്നു പ്രധാനമന്ത്രി.

‘എന്താണ് അഞ്ച് ലക്ഷം കോടി സമ്പദ് വ്യവസ്ഥ. ചുറ്റുപാടും നിരവധി സംസാരങ്ങള്‍ അതുമായി ബന്ധപ്പെട്ട് ഉണ്ടാകുന്നുണ്ട്. ഒരു സാധാരണക്കാരനായ ഇന്ത്യക്കാരനെ സംബന്ധിച്ചെടുത്തോളം ആ ലക്ഷ്യം എന്താണ്. നിങ്ങള്‍ ഇതറിയേണ്ടതും പ്രചരിപ്പിക്കേണ്ടതും ഏറെ പ്രധാനപ്പെട്ടതാണ്. എന്തുകൊണ്ട് ഇന്ത്യയ്ക്ക് വലിയ സ്വപ്നങ്ങള്‍ കണ്ടുകൂടാ ?’- മോദി ചോദിച്ചു.

അഞ്ച് ലക്ഷം കോടി സമ്പദ് വ്യവസ്ഥയാകുക എന്നത് ഇന്ത്യയെ സംബന്ധിച്ചെടുത്തോളം നിലവിലുള്ളതിന്റെ ഇരട്ടിയാണ്. ഇന്ത്യക്ക് ഈ നേട്ടം കൈവരിക്കാന്‍ സാധിക്കില്ലെന്നും അത് ഇന്ത്യയുടെ ശേഷിയുടെ അപ്പുറത്താണെന്നുമാണ് ചിലര്‍ പറയുന്നത്. പക്ഷെ കഷ്ടപ്പാടുകള്‍ നമ്മള്‍ ഇന്ത്യക്കാരെ പിന്തിരിപ്പിക്കില്ലെന്ന കാര്യം അവര്‍ മറന്നുപോയെന്നും മോദി കൂട്ടിച്ചേര്‍ത്തു.

രണ്ടാം മോദി സര്‍ക്കാരിന്റെ ആദ്യ ബജറ്റ് അവതരിപ്പിച്ച കേന്ദ്ര ധനമന്ത്രി നിര്‍മല സീതാരാമനാണ് ഇന്ത്യയെ അഞ്ച് വര്‍ഷം കൊണ്ട് അഞ്ച് ലക്ഷം കോടി സമ്പദ് വ്യവസ്ഥയാക്കുമെന്ന പ്രഖ്യാപനം ബജറ്റില്‍ നടത്തിയത്.