കോവിഡിന് മുമ്പ് മോദി അധികാരത്തിലെത്തിയത് രാജ്യത്തിന് ഭാഗ്യമായി: രാജ്യത്തെ വെല്ലുവിളികള്‍ നേരിടാന്‍ പ്രധാനമന്ത്രിക്ക് കഴിഞ്ഞെന്ന് അമിത് ഷാ

രാജ്യത്ത് കോവിഡ് വരുന്നതിന് മുൻപ് ബിജെപി അധികാരത്തില്‍ വന്നത് ഭാഗ്യമായെന്നും ഇന്ത്യ സ്വാഗതാര്‍ഹമായ മാറ്റം കണ്ടുവെന്നും കേന്ദ്രമന്ത്രി അമിത് ഷാ. രാജ്യത്തെ വെല്ലുവിളികള്‍ നേരിടാന്‍ പ്രധാനമന്ത്രിക്ക് കഴിഞ്ഞു. കേന്ദ്രത്തില്‍ പതിറ്റാണ്ടുകളായുള്ള കൂട്ടുകെട്ട് രാഷ്ട്രീയത്തിന് അന്ത്യം കുറിച്ച് ഇന്ത്യയ്ക്ക് ഒരു സ്ഥിരത ലഭിച്ചു. കോവിഡ് മഹാമാരിക്ക് ഏഴ് വര്‍ഷം മുമ്പ് 2014 ല്‍ ബിജെപി സര്‍ക്കാര്‍ പൂര്‍ണ ഭൂരിപക്ഷത്തോടെ അധികാരത്തിലെത്തിയത് രാജ്യത്തിന് സ്ഥിരത നല്‍കിയെന്നും അമിത് ഷാ പറഞ്ഞു.

അതേസമയം കോവിഡിന്റെ പുതിയ വകഭേദമായ ഒമിക്രോണ്‍ തടയാന്‍ വേണ്ട മുന്‍കരുതലുകള്‍ സ്വീകരിക്കുന്നതായും, മന്ത്രാലയങ്ങള്‍ ജാഗ്രതയോടെ പ്രവര്‍ത്തിക്കുന്നുവെന്നും അദ്ദേഹം പറഞ്ഞു. രണ്ടാം തരംഗത്തിനിടയില്‍ ഓക്‌സിജന്‍ പ്രതിസന്ധി പരിഹരിക്കാന്‍ മോദി എല്ലാം ചെയ്തു.മെഡിക്കല്‍ ഓക്‌സിജന്റെ ഉത്പാദനം 1,500 മെട്രിക് ടണ്‍ മാത്രം ആയിരുന്നു, എന്നാല്‍ നമ്മളുടെ ആവശ്യം 15,000 ആയിരുന്നു. ഇതേതുടർന്ന് മോദി ഉല്‍പ്പാദനം വര്‍ധിപ്പിച്ചുവെന്നും അദ്ദേഹം കൂട്ടിച്ചേര്‍ത്തു. പുതുതായി ഉയര്‍ന്നുവന്ന ഒമിക്രോണ്‍ വകഭേദത്തിന്റെ പുരോഗതി ഉദ്യോഗസ്ഥര്‍ നിരീക്ഷിക്കുന്നുണ്ട്. വാക്‌സിനേഷന് തന്നെയാണ് പ്രധാന മുന്‍ഗണനയെന്നും അമിത് ഷാ പറഞ്ഞു.