സംസ്ഥാനത്ത് വീണ്ടും മങ്കിപോക്സ് ? കണ്ണൂരില്‍ രോഗലക്ഷണം കാണിച്ച ഏഴ് വയസുകാരി ചികിത്സയില്‍

കണ്ണൂര്‍: മങ്കിപോക്സ് ലക്ഷണങ്ങൾ കണ്ടതിനെ തുടർന്ന് കണ്ണൂരിൽ ഏഴ് വയസുകാരിയെ ചികിത്സയിൽ പ്രവേശിപ്പിച്ചു. പരിയാരം ഗവ. മെഡിക്കൽ കോളേജ് ആശുപത്രിയിലാണ് ചികിത്സയ്ക്കായി കുട്ടിയെ പ്രവേശിപ്പിച്ചത്.

ഇന്നലെ രാത്രി യുകെയിൽ നിന്നും എത്തിയതായിരുന്നു കുട്ടി. വീട്ടിലെത്തിയതിന് ശേഷം കുട്ടിയിൽ ചെറിയ രീതിയിൽ രോഗ ലക്ഷണങ്ങൾ കണ്ടു തുടങ്ങി. ഉടൻ തന്നെ ആശുപത്രിയിലെത്തി ചികിത്സ നേടുകയായിരുന്നു. കുട്ടിയുടെ സ്രവ സാമ്പിള്‍ പരിശോധനക്ക് അയച്ചു. കുട്ടിക്കൊപ്പം വിദേശത്ത് നിന്നെത്തിയ മാതാപിതാക്കൾ നിലവിൽ നിരീക്ഷണത്തിലാണ്.

അതേസമയം, മൂന്ന് പേരുടെയും ആരോഗ്യനിലയിൽ പ്രശ്നങ്ങളൊന്നും തന്നെയില്ല എന്ന് പരിയാരം ഗവ. മെഡിക്കൽ കോളേജ് സൂപ്രണ്ട് ഡോ. കെ സുദീപ് പറഞ്ഞു. കൂടാതെ കുട്ടിയായതിനാൽ തന്നെ പ്രത്യേക ശ്രദ്ധയോടെയാണ് പരിചരിക്കുന്നതെന്നും ആശുപത്രി അധികൃതർ പറഞ്ഞു.