മോറട്ടോറിയം കാലത്തെ പലിശ; സുപ്രീംകോടതിയിൽ നിലപാടറിയിച്ച് കേന്ദ്ര സർക്കാർ

ദില്ലി: മോറട്ടോറിയം കാലത്തെ പലിശ സംബന്ധിച്ച് സുപ്രിംകോടതിയിൽ നിലപാടറിയിച്ച് കേന്ദ്ര സർക്കാർ. ആറ് മാസക്കാലയളവിലെ പലിശയുടെ പലിശ പൂർണമായും എഴുതിതള്ളുമെന്ന് ധനമന്ത്രാലയം സുപ്രിംകോടതിയിൽ വ്യക്തമാക്കി. തുടർവായ്പയും അധിക വായ്പയും യോഗ്യരായവർക്ക് സമയബന്ധിതമായി ലഭ്യമാക്കുമെന്നും കേന്ദ്രസർക്കാർ സുപ്രിംകോടതിയിൽ സമര്‍പ്പിച്ച സത്യവാങ്മൂലത്തിൽ പറയുന്നു. മോറട്ടോറിയം കാലത്തെ പലിശകൂടി എഴുതി തള്ളാനായിരുന്നു കേന്ദ്രം കഴിഞ്ഞ ദിവസം വരെ ശ്രമിച്ചത്. എന്നാൽ തുടർ ഇടപടുകൾ തടസപ്പെടും വിധം ആസ്തികളെ ഇത് ബാധിക്കുമെന്ന് ബാങ്കുകൾ ബോധ്യപ്പെടുത്തുകയായിരുന്നു.

രണ്ട് കോടിവരെയുള്ള ലോണുകളുടെ പലിശയുടെ പലിശ എഴുതി തള്ളാനും തീരുമാനിച്ചിട്ടുണ്ട്. ഇതിന്‍റെ ആനുകൂല്യം ചെറുകിട സംരംഭകർ, വിഭ്യാഭ്യാസം, വാഹന വായ്പ ഉൾപ്പടെയുള്ള എല്ലാ ഉപഭോക്താക്കൾക്കും ലഭിക്കും. തുടർവായ്പയും അധിക വായ്പയും ഉറപ്പാക്കാന്‍ വേണ്ട നടപടികള്‍ സ്വീകരിച്ചതായും കേന്ദ്രം സുപ്രിംകോടതിയിൽ അറിയിച്ചു.