മുണ്ടത്തിക്കോട് വെടിക്കെട്ട് ദുരന്തം! തിരച്ചിൽ ഊർജിതമാക്കാൻ കഡാവർ നായ്ക്കളും റോബോട്ടുകളും, അഞ്ച് മൃതദേഹങ്ങൾ ബന്ധുക്കൾക്ക് വിട്ടുനൽകി

തൃശ്ശൂർ മുണ്ടത്തിക്കോട് വെടിക്കെട്ടുപുരയിലുണ്ടായ സ്ഫോടനത്തിൽ മരിച്ചവരുടെ എണ്ണം 13 ആയി ഉയർന്നു. ചികിത്സയിലുള്ളവരിൽ രണ്ടുപേർ നിലവിൽ വെന്റിലേറ്ററിലാണ്. പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം തിരിച്ചറിഞ്ഞ അഞ്ച് മൃതദേഹങ്ങൾ ഇതിനകം ബന്ധുക്കൾക്ക് വിട്ടുനൽകി. ദുരന്തത്തിന്റെ പശ്ചാത്തലത്തിൽ കാണാതായവർക്കായുള്ള തിരച്ചിൽ പ്രവർത്തനങ്ങൾ സ്ഥലത്ത് കൂടുതൽ ഊർജിതമാക്കിയിരിക്കുകയാണ്.

മൃതദേഹ അവശിഷ്ടങ്ങളുടെ ശാസ്ത്രീയമായ തിരിച്ചറിയലിനായി ഡിഎൻഎ പരിശോധന ഇന്ന് നടക്കും. കഡാവർ നായ്ക്കളെ ഉപയോഗിച്ചുള്ള പരിശോധനയാണ് ഇപ്പോൾ നടക്കുന്നത്. ഇതിനു പുറമെ, എറണാകുളത്തുനിന്ന് പ്രത്യേക റോബോട്ടുകളെ എത്തിച്ചും തിരച്ചിൽ നടത്തുമെന്ന് സംസ്ഥാന ഫയർഫോഴ്സ് മേധാവി നിതിൻ അഗർവാൾ വ്യക്തമാക്കി. സംഭവത്തിൽ മജിസ്റ്റീരിയൽ അന്വേഷണത്തിന് സർക്കാർ ഉത്തരവിട്ടിട്ടുണ്ട്. അന്വേഷണ റിപ്പോർട്ട് ലഭിച്ച ശേഷം കർശനമായ തുടർനടപടികളുണ്ടാകുമെന്ന് ജില്ലാ കളക്ടർ അറിയിച്ചു. പോലീസും സ്വമേധയാ കേസെടുത്ത് അന്വേഷണം ആരംഭിച്ചു. മരിച്ചവരുടെ കുടുംബങ്ങൾക്ക് കേന്ദ്ര സർക്കാർ രണ്ട് ലക്ഷം രൂപ വീതം ധനസഹായം പ്രഖ്യാപിച്ചു. അടിയന്തര സാഹചര്യങ്ങൾ നേരിടാനായി സംസ്ഥാന സർക്കാർ ജില്ലാ ഭരണകൂടത്തിന് 50 ലക്ഷം രൂപ അനുവദിക്കുകയും ചെയ്തു. അപകടത്തെക്കുറിച്ചുള്ള തത്സമയ വിവരങ്ങൾക്കായി മുണ്ടത്തിക്കോട് വില്ലേജ് ഓഫീസിലും തൃശ്ശൂർ താലൂക്ക് ഓഫീസിലും പ്രത്യേക കൺട്രോൾ റൂമുകൾ തുറന്നിട്ടുണ്ട്.