നെടുമങ്ങാട് ഒന്നര വയസ്സുകാരന്റെ കൊലപാതകം; മുത്തശ്ശിയുടെ പരാതിയിൽ എന്തുകൊണ്ട് പോലീസ് കേസെടുത്തില്ലെന്ന് ഹൈക്കോടതി; സംസ്ഥാന സർക്കാരിനോട് വിശദമായ റിപ്പോർട്ട് തേടി

തിരുവനന്തപുരം : നെടുമങ്ങാട് ഒന്നര വയസ്സുകാരനെ പങ്കാളിയും അമ്മയും ചേർന്ന് കൊലപ്പെടുത്തിയ സംഭവത്തിൽ സംസ്ഥാന സർക്കാരിനോട് വിശദമായ റിപ്പോർട്ട് തേടി ഹൈക്കോടതി. സംഭവത്തിൽ കോടതി സ്വമേധയാ കേസെടുത്തിരുന്നു. സംഭവത്തെക്കുറിച്ച് അന്വേഷിക്കുന്ന ഉദ്യോഗസ്ഥൻ ഒരാഴ്ചയ്ക്കകം മറുപടി നൽകണമെന്ന് ജസ്റ്റിസ് ഉത്തരവിട്ടു. കേസിന്റെ ഗൗരവം കണക്കിലെടുത്ത് അന്വേഷണ പുരോഗതി സംബന്ധിച്ച റിപ്പോർട്ട് മുദ്രവെച്ച കവറിൽ വേണം സമർപ്പിക്കാനെന്നും ഹൈക്കോടതി പ്രത്യേകം വ്യക്തമാക്കിയിട്ടുണ്ട്.

കുഞ്ഞിന്റെ സുരക്ഷ മുൻനിർത്തി മുത്തശ്ശി നേരത്തെ തന്നെ പോലീസിൽ പരാതി നൽകിയിരുന്നിട്ടും അതിൽ എന്തുകൊണ്ട് കേസെടുത്ത് അന്വേഷണം നടത്തിയില്ലെന്ന് കോടതി രൂക്ഷമായി വിമർശിച്ചു. പോലീസിന്റെ ഭാഗത്തുനിന്നുണ്ടായ വീഴ്ചയാണോ കുഞ്ഞിന്റെ ജീവൻ നഷ്ടപ്പെടാൻ ഇടയാക്കിയതെന്ന കാര്യവും കോടതി പരിശോധിക്കുന്നുണ്ട്. നിയമസംവിധാനങ്ങളുടെയും ചൈൽഡ് വെൽഫെയർ കമ്മിറ്റി ഉൾപ്പെടെയുള്ള ഏജൻസികളുടെയും ഭാഗത്തുനിന്ന് യഥാസമയം ഇടപെടലുണ്ടാകാത്തതിനെ അതീവ ഗൗരവത്തോടെയാണ് ഹൈക്കോടതി വീക്ഷിക്കുന്നത്.