വ്യക്തിജീവിതത്തെ സ്വപ്‌ന തകർത്തെന്ന് എം വി ഗോവിന്ദൻ; ചില്ലിക്കാശ് നഷ്ടപരിഹാരം തരില്ലെന്നും മാപ്പുപറയില്ലെന്നും സ്വപ്ന; മാനനഷ്ടക്കേസിൽ സാക്ഷിവിസ്താരത്തിന് ഇന്ന് തുടക്കം; സ്വർണ്ണക്കടത്ത് കേസ് വീണ്ടും കത്തിപ്പടരുമോ ?

കണ്ണൂർ: സ്വപ്നാ സുരേഷ് തനിക്കെതിരെ ഉയർത്തിയ ആരോപണങ്ങൾ തന്റെ വ്യക്തിജീവിതത്തെ തകർത്തുകളഞ്ഞെന്ന് എം വി ഗോവിന്ദൻ കോടതിയിൽ. സ്വപ്നക്കെതിരായ മാനനഷ്ടക്കേസിൽ സാക്ഷി വിസ്താരം ഇന്ന് തുടങ്ങാനിരിക്കെ സ്വർണ്ണക്കടത്ത് കേസ് വീണ്ടും കത്തിപ്പടരുമോ എന്ന ആശങ്കയിലാണ് സിപിഎം. മാനനഷ്ടക്കേസ് കോടതിയിലെത്തിയാൽ കൂടുതൽ കാര്യങ്ങൾ വെളിപ്പെടുത്തുമെന്ന് സ്വപ്നയുടെ നിലപാട് തന്നെയാണ് ആശങ്കക്ക് പിന്നിൽ. തളിപ്പറമ്പ് മജിസ്‌ട്രേറ്റ് കോടതിയാണ് കേസ് പരിഗണിക്കുന്നത്. മുന്‍ എഡിഎം എ സി മാത്യു, സിപിഐഎം ഏരിയാ കമ്മറ്റി അംഗം കെ ഗണേശന്‍ എന്നിവരാണ് ഇന്ന് സാക്ഷി വിസ്താരത്തിന് ഹാജരാകേണ്ടത്.

കേസിൽ എംവി ഗോവിന്ദന്റെ മൊഴി തളിപ്പറമ്പ് മജിസ്‌ട്രേറ്റ് കോടതി രേഖപ്പെടുത്തിയിരുന്നു. സ്വര്‍ണ്ണക്കടത്ത് കേസില്‍ മുഖ്യമന്ത്രിക്ക് എതിരായ പരാതി പിന്‍വലിക്കാന്‍ വിജേഷ് പിള്ള വഴി എംവി ഗോവിന്ദന്‍ 30 കോടി രൂപ വാഗ്ദാനം ചെയ്‌തെന്നായിരുന്നു സ്വപ്നയുടെ വെളിപ്പെടുത്തല്‍. ഇതാണ് മാനനഷ്ടക്കേസിന് ആധാരമായത്. ആരോപണത്തിന് പിറകിൽ ഗൂഢാലോചനയുണ്ടെന്നും തൻറെ വ്യക്തി ജീവിതത്തിൽ കരിനിഴലിൽ വീഴ്ത്തിയെന്നുമാണ് മാനഷ്ട പരാതിയിൽ എംവി ഗോവിന്ദൻ കോടതിയിൽ ചൂണ്ടികാട്ടിയത്. അതേസമയം, ചില്ലിക്കാശു പോലും നഷ്ടപരിഹാരം നല്‍കില്ലെന്നും മാപ്പു പറയില്ലെന്നും സ്വപ്‌ന സുരേഷ് നേരത്തെ വ്യക്തമാക്കിയിരുന്നു. ഏതു നിയമ നടപടികളും നേരിടാന്‍ തയാറാണെന്നും സ്വപ്‌ന പറഞ്ഞിരുന്നു. കേസ് കോടതിയിലെത്തിയാൽ കൂടുതൽ കാര്യങ്ങൾ വെളിപ്പെടുത്താനുണ്ടെന്നും സ്വപ്ന പറഞ്ഞിരുന്നു.