സ്വപ്ന സുരേഷിന്റെ വെല്ലുവിളി ഏറ്റെടുക്കുന്നു; കേസുമായി മുന്നോട്ടു പോകുമെന്ന് എം.വി.ഗോവിന്ദന്‍

തിരുവനന്തപുരം : ഫെയ്സ്ബുക് ലൈവിൽ വന്ന് നടത്തിയ വെളിപ്പെടുത്തലുകളെത്തുടർന്ന് സ്വർണക്കടത്ത് കേസ് പ്രതി സ്വപ്ന സുരേഷിനെതിരെ മാനനഷ്ട കേസുമായി മുന്നോട്ട് പോകുമെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദൻ വ്യക്തമാക്കി. ഇന്നലെ പുറത്ത് സാമൂഹ്യ മാദ്ധ്യമത്തിലൂടെ പുറത്ത് വിട്ട മറുപടിക്കത്തിൽ താൻ മാപ്പു പറയില്ലെന്നും നഷ്ടപരിഹാരം നൽകില്ലെന്നും സ്വപ്ന സുരേഷ് വ്യക്തമാക്കിയിരുന്നു. ഇതിനെത്തുടർന്നാണ് എം.വി.ഗോവിന്ദന്റെ പ്രതികരണം .

ഒരു കോടി രൂപ നഷ്ടപരിഹാരം ആവശ്യപ്പെട്ടായിരുന്നു എം.വി.ഗോവിന്ദൻ സ്വപ്നയ്ക്ക് വക്കീൽ നോട്ടിസയച്ചത്. നഷ്ടപരിഹാരമായി ആവശ്യപ്പെടുന്ന ഒരു കോടിയുടെ 10% തുക കെട്ടിവച്ച് കേസിനു പോകുമോ എന്നറിയാൻ കാത്തിരിക്കുന്നു എന്ന സ്വപ്ന സുരേഷിന്റെ വെല്ലുവിളി ഏറ്റെടുക്കുകയാണെന്ന് ഗോവിന്ദൻ പറഞ്ഞു.

തന്നെ എം.വി.ഗോവിന്ദൻ അയച്ചെന്ന് വിജേഷ് പിള്ള പറഞ്ഞെന്നാണ് ഫെയ്സ്ബുക് ലൈവിൽ പറഞ്ഞതെന്നും വക്കീൽ നോട്ടിസിനുള്ള മറുപടിയിൽ സ്വപ്ന പറഞ്ഞിരുന്നു. എല്ലാം അവസാനിപ്പിച്ചു നാടുവിടാൻ വിജേഷ് പിള്ള വഴി തനിക്ക് 30 കോടി വാഗ്ദാനം ചെയ്തു എന്നായിരുന്നു നേരത്തെ ഫെയ്സ്ബുക് ലൈവിലെത്തി സ്വപ്നയുടെ ആരോപിച്ചിരുന്നത്.