അറിയാത്ത ചോദ്യങ്ങൾക്ക് ടീച്ചറെ പുകഴ്ത്തിയും സിനിമ പാട്ടെഴുതിയും വിദ്യാർഥി;കൊള്ളാം, പക്ഷേ ഇത് ഇവിടെ വര്‍ക്ക് ആകില്ലെന്ന് ടീച്ചർ;വൈറലായി ഉത്തരക്കടലാസ്

പരീക്ഷയ്ക്ക് അറിയാത്ത ചോദ്യങ്ങൾ ചോദിക്കുമ്പോൾ വിദ്യാർഥികൾ എന്തെങ്കിലുമൊക്കെ എഴുതി വയ്ക്കുന്നത് പതിവാണ്. ഇത്തരത്തിലുള്ള ഒരു ഉത്തരക്കടലാസാണ് ഇപ്പോള്‍ സോഷ്യല്‍ മീഡിയയില്‍ വൈറലായിക്കൊണ്ടിരിക്കുന്നത്. സിനിമാ പാട്ട് ഉൾപ്പെടെയാണ് വിദ്യാർഥി ഉത്തരക്കടലാസിൽ എഴുതിവച്ചിരിക്കുന്നത്. എന്നാൽ അതിന് വളരെ സരസമായാണ് ടീച്ചര്‍ മറുപടി നല്കുന്നതെന്നതാണ് ശ്രദ്ധേയം.

മൂന്ന് ചോദ്യങ്ങള്‍ക്ക് വിദ്യാര്‍ത്ഥി എഴുതിയ ഉത്തരമാണ് വൈറലായിരിക്കുന്നത്. ആദ്യത്തെ ചോദ്യത്തിന് കുട്ടി എഴുതിയിരിക്കുന്ന ഉത്തരം ഗീവ് മീ സം സണ്‍ഷൈന്‍, ഗീവ് മീ സം റെയ്ന്‍ എന്ന ഗാനത്തിന്റെ വരികളാണ്. രണ്ടാമത്തെ ചോദ്യത്തിനുള്ള ഉത്തരമായി കുട്ടി ടീച്ചറെ നന്നായി പുകഴ്ത്തുകയാണ്. ടീച്ചറേ, ടീച്ചര്‍ വളരെ ബുദ്ധിയുള്ള ഒരു ടീച്ചറാണ്. നന്നായി പഠിക്കാത്തത് എന്റെ മാത്രം കുറ്റമാണ്. ദൈവമേ എനിക്ക് എന്തെങ്കിലും കഴിവുകള്‍ തരണേ എന്ന പ്രാര്‍ഥനയുമാണ് രണ്ടാമത്തെ ചോദ്യത്തിനുള്ള മറുപടി വിദ്യാർഥി എഴുതിയിരിക്കുന്നത്.

മൂന്നാമത്തെ ചോദ്യത്തിനുള്ള ഉത്തരവും ഒരു സിനിമാപ്പാട്ട് തന്നെയാണ്. പികെ എന്ന ചിത്രത്തിലെ ഭഗവാന്‍ ഹൈ കഹാന്‍ എന്ന് തുടങ്ങുന്ന ഗാനമാണ് വിദ്യാര്‍ത്ഥി മൂന്നാമത്തെ ചോദ്യത്തിന് ഉത്തരമായി എഴുതിയിരിക്കുന്നത്. എന്നാൽ കൊള്ളാം പക്ഷേ ഇത് ഇവിടെ വര്‍ക്ക് ആകില്ല എന്നാണ് ടീച്ചര്‍ നൽകിയിരിക്കുന്ന മറുപടി.