മുഖ്യമന്ത്രിയുടെ ചാര്‍ട്ടേര്‍ഡ് വിമാനയാത്രയിലെ ദുരൂഹത വര്‍ദ്ധിക്കുന്നു. യാത്രയുടെ സ്‌പോണ്‍സര്‍ ആരെന്ന് സോഷ്യല്‍ മീഡിയ. പേര് പറയാന്‍ മുഖ്യമന്ത്രി മടിക്കുന്നതെന്തുകൊണ്ടെന്നും ചോദ്യം

തിരുവനന്തപുരം : മലപ്പുറത്തെ മഴക്കെടുതി ബാധിത പ്രദേശങ്ങളിലേക്ക് ചാര്‍ട്ടേഡ് വിമാനത്തില്‍ യാത്ര നടത്തിയതിന് പണം മുടക്കിയത് ആരെന്ന് ഇനിയും മുഖ്യമന്ത്രി വി ഡി സതീശന്‍ ഉത്തരം നല്‍കിയിട്ടില്ല. ആ വ്യക്തിയെ കുറിച്ചുള്ള മാധ്യമങ്ങളുടെ ചോദ്യം എന്തിനാണ് മുഖ്യമന്ത്രിയെ അസ്വസ്ഥനാക്കുന്നത്. അത്തരത്തില്‍ അസ്വസ്ഥനാകുന്നുവെങ്കില്‍, പുറംലോകത്തെ അറിയിക്കാന്‍ താല്പര്യമില്ലെങ്കില്‍ അതില്‍ ഒരു ദുരൂഹതയുണ്ടെന്നുള്ള ആരോപണമാണ് പരക്കെ ഉയരുന്നത്.

ഇതു സംബന്ധിച്ച മാധ്യമപ്രവത്തകരുടെ ചോദ്യത്തില്‍ അസംതൃപ്തനായ മുഖ്യമന്ത്രി മലപ്പുറം യാത്ര സര്‍ക്കാര്‍ ചെലവിലല്ലെന്നും, ആരാണ് പണം മുടക്കിയത് എന്ന് പറയുന്നത് എന്തിനാണെന്നും ചോദിച്ചു. മലപ്പുറത്ത് വലിയ അപകടം ഉണ്ടായി. പോയില്ലെങ്കില്‍ 6 പേര് മരിച്ചിട്ടും പോകാത്തതെന്താണെന്ന് ചോദിക്കും. മുഖ്യമന്ത്രി തിരിഞ്ഞു നോക്കിയില്ലെന്ന് പറയും. പരിചയക്കാരന്‍ വിമാനം അറേഞ്ച് ചെയ്തു തന്നു. അതിലെന്ത് തെറ്റെന്നാണ് സതീശന്റെ ചോദ്യം. മലയാളി ആയ ഒരാള്‍ അറേഞ്ച് ചെയ്ത ഫ്‌ലൈറ്റിലാണ് പോയത്. ഇനിയും പോകും. അതില്‍ എന്താണ് തെറ്റ്. പിണറായിയും ഉമ്മന്‍ ചാണ്ടിയും പോയിട്ടുണ്ട്. പിണറായി ആരുടെ വിമാനത്തില്‍ പോയി എന്ന് ഞാന്‍ പ്രതിപക്ഷത്തുള്ളപ്പോള്‍ ഞാന്‍ ചോദിച്ചില്ല. വിമാനം അറേഞ്ച് ചെയ്യുന്നവര്‍ ഔദാര്യം കൈപറ്റുന്നവരല്ല. ഇനിയും ഞാന്‍ പോകുമെന്നും ആരാണ് പണം മുടക്കിയതെന്ന് പറയാനുദ്ദേശിക്കുന്നില്ലെന്നുമാണ് ഇതേക്കുറിച്ചുള്ള മുഖ്യമന്ത്രി വി ഡി സതീശന്റെ മറുപടി.