നരേന്ദ്ര മോദി ശക്തനായ ഭരണാധികാരി! കോൺഗ്രസ് ഭരണകാലത്തെ പോലെ അഴിമതിയില്ല; പ്രധാനമന്ത്രിയെ പുകഴ്ത്തി സിപിഐഎം നേതാവ് ജി സുധാകരൻ

പ്രധാനമന്ത്രി ശക്തനായ ഭരണാധികാരിയെന്ന് മുതിർന്ന സിപിഐഎം നേതാവ് ജി സുധാകരൻ. നരേന്ദ്ര മോദിയ്‌ക്കൊപ്പം മികച്ച ഒരു കാബിനറ്റ് ഉണ്ടായിരുന്നു. വ്യക്തിപരമായി ഒരു കേന്ദ്ര മന്ത്രിക്കെതിരെയും അഴിമതി ആരോപണങ്ങൾ ഉയർന്നു കേട്ടിട്ടില്ലെന്നും ജി സുധാകരൻ വ്യക്തമാക്കി.

കോൺഗ്രസ് സർക്കാരിന്റെ കാലത്ത് അഴിമതിയിൽ മുങ്ങിയ ഭരണമായിരുന്നു നടന്നത്. എന്നാൽ, നരേന്ദ്ര മോദി സർക്കാരിലെ കേന്ദ്ര മന്ത്രിമാരിൽ ആർക്കെതിരെയും അഴിമതി ആരോപണങ്ങൾ ഉണ്ടായതായി താൻ കണ്ടിട്ടില്ല. നല്ലൊരു കാബിനറ്റ് നരേന്ദ്ര മോദിയ്ക്കുണ്ട്. മോദി ശക്തനായ ഭരണാധികാരിയാണ്. ബിജെപിയ്ക്ക് നല്ല വേരോട്ടമുള്ള സ്ഥലമാണ് കേരളമെന്നും അദ്ദേഹം ചൂണ്ടിക്കാട്ടി.

സംസ്ഥാന സർക്കാരിനെതിരെയും ജി സുധാകരൻ രൂക്ഷവിമർശനമുന്നയിച്ചു. ഒരാൾ വിചാരിച്ചാൽ, എല്ലാവരെയും അടക്കി നിർത്താൻ കഴിയില്ല. മറ്റുള്ളവർ പേടിച്ച് മിണ്ടാതെ ഇരിക്കുന്നത് എന്തിനാണ്. സർക്കാരിന്റെ പ്രവർത്തനങ്ങളിൽ ജനങ്ങൾക്ക് അതൃപ്തിയുണ്ടെന്നും അദ്ദേഹം കുറ്റപ്പെടുത്തി.