പാക് ജനറൽമാർ ഇന്ത്യൻ സേനയുടെ ശൗര്യത്തിന് മുന്നിൽ കീഴടങ്ങിയ വിജയ് ദിവസിന്റെ ഓർമ്മ പുതുക്കി രാഷ്ട്രം; സൈനികരുടെ ധീരതയെ പ്രണമിച്ച് പ്രധാനമന്ത്രിയും പ്രതിരോധ മന്ത്രിയും; പുതിയ രാഷ്ട്രീയ സാഹചര്യങ്ങളിലും ഇന്ത്യയിലും ബംഗ്ലാദേശിലും വിജയ് ദിവസ് ആഘോഷത്തിന് മാറ്റമില്ല

ദില്ലി: 1971 ലെ ഇന്ത്യ പാകിസ്ഥാൻ യുദ്ധത്തിൽ നേടിയ ചരിത്ര വിജയത്തിന്റെ ഓർമപുതുക്കി രാഷ്ട്രം. സൈന്യത്തിന്റെ ധീരതയെയും ത്യാഗത്തെയും അനുസ്മരിച്ച് പ്രധാനമന്ത്രി നരേന്ദ്രമോദിയും പ്രതിരോധമന്ത്രി രാജ്‌നാഥ് സിംഗും. വിജയ ദിവസത്തിൽ സൈന്യത്തിന്റെ ധീരതയുടെയും ത്യാഗത്തിന്റെയും മുന്നിൽ പ്രണമിക്കുന്നുവെന്നും അവരുടെ നിസ്വാർത്ഥ സേവനമാണ് രാജ്യത്തെ സംരക്ഷിച്ച് പുരോഗതിയിലേക്ക് നയിക്കുന്നതെന്നും, തലമുറകൾ ഈ ചരിത്ര വിജയത്തെ നന്ദിയോടെ സ്മരിക്കുന്നുവെന്നും പ്രധാനമന്ത്രി എക്‌സിൽ കുറിച്ചു. രാഷ്ട്രം സൈന്യത്തിന്റെ സംഭാവനകൾ ഒരിക്കലും മറക്കില്ലെന്ന് പ്രതിരോധമന്ത്രി രാജ്‌നാഥ് സിംഗും സമൂഹ മാദ്ധ്യമങ്ങളിൽ കുറിച്ചു.

1971 ൽ 13 ദിവസം നീണ്ടുനിന്ന ഇന്ത്യ പാകിസ്ഥാൻ യുദ്ധത്തിൽ ഇന്ത്യയുടെ യുദ്ധ തന്ത്രങ്ങൾക്ക് മുന്നിൽ പിടിച്ചുനിൽക്കാൻ കഴിയാതെ പാക് ജനറൽ നിയാസി ഇന്ത്യൻ സേനയ്ക്ക് മുന്നിൽ നിരുപാധികം കീഴടങ്ങുകയായിരുന്നു. ഈ യുദ്ധമാണ് അന്നത്തെ കിഴക്കൻ പാകിസ്ഥാൻ സ്വതന്ത്രമായി ബംഗ്ലാദേശ് എന്ന സ്വതന്ത്ര രാജ്യത്തിന്റെ രൂപീകരണത്തിലേക്ക് നയിച്ചത്. ശത്രുവിനെ തോൽപ്പിക്കാനായി നടത്തിയ ഏകോപിത സൈനിക നീക്കത്തിൽ നിർണ്ണായക പങ്കുവഹിക്കാൻ കഴിഞ്ഞതിൽ ചാരിതാർഥ്യമെന്ന് വ്യോമസേനയും പ്രതികരിച്ചു.

അന്നുമുതൽ ഇന്ത്യയും ബംഗ്ലദേശും ഒരുമിച്ചാണ് വിജയ് ദിവസ് ആഘോഷിക്കുന്നത്. ബംഗ്ലാദേശിലെ പുതിയ രാഷ്ട്രീയ സാഹചര്യത്തിലും വിജയ് ദിവസ് ആഘോഷം മാറ്റമില്ലാതെ നടക്കുകയാണ്. അൻപത്തിമൂന്നാം വിജയ് ദിവസ് ആഘോഷിക്കുന്ന ഇത്തവണയും ബംഗ്ലാദേശ് യുദ്ധത്തിൽ പങ്കെടുത്ത 8 ഇന്ത്യൻ വിമുക്ത ഭടന്മാരും രണ്ട് സെർവിങ് സൈനിക ഉദ്യോഗസ്ഥരും സംയുക്ത ആഘോഷങ്ങൾക്കായി ധാക്കയിലെത്തി. കൊൽക്കത്തയിൽ നടക്കുന്ന ആഘോഷ പരിപാടികളിൽ പങ്കെടുക്കാനായി ബംഗ്ലാദേശിൽ നിന്ന് എട്ട് സ്വാതന്ത്ര്യ സമര സേനാനികളും രണ്ട് സൈനിക ഉദ്യോഗസ്ഥരും ഇന്ത്യയിലേക്കും എത്തിയിട്ടുണ്ട്.