രക്ഷാപ്രവർത്തന കേസ്! എഡിജിപിയുടെ ഓഫീസിൽ ഗൂഢാലോചന നടന്നുവെന്ന് എസ്ഐടി; മാദ്ധ്യമങ്ങൾക്ക് വിവരങ്ങൾ ചോർന്നതിൽ കോടതിക്ക് കടുത്ത അതൃപ്തി

ആലപ്പുഴ : നവകേരള സദസ്സ് പ്രക്ഷോഭത്തിനിടെ യൂത്ത് കോൺഗ്രസ്-കെ.എസ്.യു. നേതാക്കളെ മുഖ്യമന്ത്രിയുടെ അംഗരക്ഷകർ മർദിച്ച കേസ് അട്ടിമറിക്കാൻ അന്നത്തെ ക്രമസമാധാന ചുമതലയുള്ള എഡിജിപിയുടെ ഓഫീസിൽ ഗൂഢാലോചന നടന്നതായി പ്രത്യേക അന്വേഷണസംഘം കോടതിയിൽ. കേസ് മുൻപ് അന്വേഷിച്ച ഡിവൈഎസ്പിയും എഡിജിപിയുടെ ഓഫീസിലെ ഉദ്യോഗസ്ഥരും നൽകിയ മൊഴികളുടെ അടിസ്ഥാനത്തിലാണ് എസ്ഐടിയുടെ ഈ പുതിയ കണ്ടെത്തൽ. കേസ് എഴുതിത്തള്ളാനുള്ള ആദ്യ റിപ്പോർട്ട് തയ്യാറാക്കിയത് എഡിജിപി ഓഫീസിൽ വെച്ചാണെന്ന് വ്യക്തമാക്കുന്ന റിപ്പോർട്ടാണ് എസ്ഐടി ആലപ്പുഴ സെഷൻസ് കോടതിയിൽ സമർപ്പിച്ചത്. ഇതോടെ അന്നത്തെ ക്രമസമാധാന ചുമതലയുണ്ടായിരുന്ന എഡിജിപി എംആർ അജിത് കുമാറിലേക്ക് അന്വേഷണം നീളുന്ന സാഹചര്യമാണ് നിലവിലുള്ളത്.

മേലുദ്യോഗസ്ഥരുടെ സമ്മർദ്ദം മൂലം കേസ് അട്ടിമറിക്കാൻ ശ്രമിച്ചെന്ന വാദിഭാഗത്തിന്റെ ആരോപണങ്ങൾക്ക് ബലമേകുന്നതാണ് എസ്ഐടിയുടെ പുതിയ റിപ്പോർട്ട്. കൂടാതെ, മർദനം നടന്ന സമയത്ത് പോലീസിന്റെ ഔദ്യോഗിക ഫോട്ടോഗ്രാഫർക്ക് സംഭവസ്ഥലത്ത് എത്താൻ കഴിഞ്ഞിരുന്നില്ലെന്നും അക്രമം അവസാനിച്ച ശേഷമാണ് അദ്ദേഹം എത്തിയതെന്നും എസ്.ഐ.ടി കോടതിയെ അറിയിച്ചു. അതിനാൽ പോലീസിന്റെ പക്കലുള്ള ദൃശ്യങ്ങളിൽ മർദനത്തിന്റെ തെളിവുകളില്ലെന്നും, സ്വകാര്യ ചാനലുകൾ പുറത്തുവിട്ട ദൃശ്യങ്ങളാണ് കേസിലെ പ്രധാന തെളിവുകളെന്നും അന്വേഷണസംഘം വ്യക്തമാക്കി.

അതേസമയം, കേസിലെ പ്രതികളായ പോലീസുകാരുടെ മുൻകൂർ ജാമ്യാപേക്ഷ പരിഗണിക്കവെ എസ്ഐടിയുടെ നടപടികളിൽ ആലപ്പുഴ സെഷൻസ് കോടതി കടുത്ത അതൃപ്തി രേഖപ്പെടുത്തി. ഔദ്യോഗിക അന്വേഷണ റിപ്പോർട്ട് കോടതിയിൽ സമർപ്പിക്കുന്നതിന് മുൻപ് എങ്ങനെ മാധ്യമങ്ങൾക്ക് ലഭിച്ചു എന്ന് കോടതി രൂക്ഷമായ ഭാഷയിൽ ചോദിച്ചു. എസ്ഐടിക്ക് ഈ കേസിൽ വ്യക്തിപരമായ താല്പര്യങ്ങൾ ഉണ്ടോ എന്ന് സംശയിച്ച കോടതി, അന്വേഷണ വിവരങ്ങൾ ആദ്യം നൽകേണ്ടത് മാദ്ധ്യമങ്ങൾക്കല്ല, കോടതിയിലല്ലേ എന്നും ഓർമ്മിപ്പിച്ചു.

പ്രതികൾക്കെതിരെ ആദ്യം ജാമ്യം ലഭിക്കാവുന്ന വകുപ്പുകൾ ചുമത്തിയ ശേഷം, പിന്നീട് പെട്ടെന്ന് നരഹത്യാശ്രമം (ഐ.പി.സി 308) ഉൾപ്പെടെയുള്ള ജാമ്യമില്ലാ വകുപ്പുകൾ കൂട്ടിച്ചേർത്തതിനെയും കോടതി കടുപ്പിച്ചു ചോദ്യം ചെയ്തു. പ്രതികൾക്ക് ജാമ്യം ലഭിക്കുന്ന അവസ്ഥ വന്നപ്പോഴാണോ ഇത്തരത്തിൽ പെട്ടെന്ന് വകുപ്പുകൾ മാറ്റിച്ചേർത്തതെന്ന് കോടതി ആരാഞ്ഞു. എസ്ഐടിയെയും പ്രോസിക്യൂഷനെയും പ്രതിക്കൂട്ടിലാക്കുന്ന കോടതിയുടെ കടുത്ത പരാമർശങ്ങൾക്കിടെ പ്രതികളുടെ മുൻകൂർ ജാമ്യാപേക്ഷയിൽ വാദം തുടരുകയാണ്.