ആളില്ലാ കസേരകളായി നവകേരള സദസ് ; അങ്ങനെ അതും പൊളിഞ്ഞു !

സർക്കാർ കൊട്ടിഘോഷിച്ച് നടത്തുന്ന നവകേരള സദസിൽ ആളില്ല എന്ന ആരോപണം ശക്തമായി കൊണ്ടിരിക്കുകയാണ്. നവകേരള സദസിൽ ആളെ കൂട്ടുന്നതിനായി, വിദ്യാർഥികളെ നിർബന്ധമായി പങ്കെടുപ്പിക്കണമെന്ന് ഇന്നലെ വിദ്യാഭ്യാസ വകുപ്പ് ഉത്തരവിറക്കിയത് ഏറെ വിവാദങ്ങൾക്ക് ഇടയാക്കിയിരുന്നു. ഇപ്പോഴിതാ, നവകേരളസദസിലേക്ക് ആളെ കൂട്ടാൻ പെടാപാട് പെടുകയാണ് സർക്കാർ ഉദ്യോ​ഗസ്ഥൻ. ആലപ്പുഴ ജില്ലാ ഡെപ്യൂട്ടി ഡയറക്ടർ സി.കെ.ഷിബുവാണ് പ്രായമായവർക്കും സ്ത്രീകൾക്കും ഉൾപ്പെടെയുള്ളവർക്ക്, ക്ലാസെടുത്തും സർക്കാരിന്റെ മഹിമ അടിച്ചേൽപ്പിച്ചും നവകേരള സദസിലേക്ക് ക്ഷണിച്ചിരിക്കുന്നത്.

ഷിബുവിന്റെ ക്ലാസിന്റെ വീഡിയോ സമൂഹമാദ്ധ്യമങ്ങളിൽ വൈറലാവുകയാണ്. ഇതിന് പിന്നാലെ വ്യാപക വിമർശനമാണ് ഇപ്പോൾ ഉയർന്നുവരുന്നത്. ആലപ്പുഴയിൽ നടത്തിയ ക്ലാസിനെ രൂക്ഷമായി വിമർശിച്ച് കൊണ്ട് ബിജെപി സംസ്ഥാന വക്താവ് സന്ദീപ് വചസ്പതിയും രംഗത്തെത്തിയിട്ടുണ്ട്. പരിപാടിയ്‌ക്ക് ആളെ കൂട്ടാൻ ഇറങ്ങുന്നത് ലളിതമായ ഭാഷയിൽ പറഞ്ഞാൽ, തെമ്മാടിത്തമാണെന്ന് സന്ദീപ് വാചസ്പതി തുറന്നടിച്ചു. ഡിവൈഎഫ്ഐ ഏരിയ സെക്രട്ടറി ആയിരുന്നതിന്റെ ഹാം​ഗ്ഓവർ മാറിയിട്ടില്ലെങ്കിൽ രാജി വെച്ച് പാർട്ടി വളർത്താൻ ഇറങ്ങണമെന്നും സന്ദീപ് വാചസ്പതി വീഡിയോ പങ്കുവെച്ചുകൊണ്ട് ഫേസ്ബുക്കിൽ കുറിച്ചു. സർക്കാർ ഉദ്യോഗസ്ഥർ സർക്കാർ പരിപാടിയിൽ പങ്കെടുക്കുന്നതിൽ അസ്വാഭാവികത ഇല്ല. എന്നാൽ പരിപാടിക്ക് ആളെ കൂട്ടാൻ ഇറങ്ങുന്നത് ലളിതമായ ഭാഷയിൽ പറഞ്ഞാൽ തെമ്മാടിത്തമാണ്. പഞ്ചായത്ത് വകുപ്പിൽ ആലപ്പുഴ ജില്ലാ ഡെപ്യൂട്ടി ഡയറക്ടറായി ഇരുന്ന് ശമ്പളം വാങ്ങുന്ന സി.കെ.ഷിബു എന്ന മാന്യനാണ് ഇയാൾ. പൊതുപണം വാങ്ങി പുട്ടടിച്ചിട്ട് ഇയാൾ ഇപ്പോൾ ചെയ്യുന്ന സേവനം സിപിഎമ്മിന് വേണ്ടിയുള്ള കുഴലൂത്താണെന്നും സന്ദീപ് വാചസ്പതി പരിഹസിക്കുന്നു. ഡിവൈഎഫ്ഐ മാരാരിക്കുളം ഏരിയ സെക്രട്ടറി ആയിരുന്നതിന്റെ ഹാം​ഗ്ഓവർ മാറിയിട്ടില്ലെങ്കിൽ രാജി വെച്ച് പാർട്ടി വളർത്താൻ ഇറങ്ങണം. അതാണ് മാന്യത. അല്ലാതെ ഈ നാട്ടിലെ സാധാരണക്കാരന്റെ പണം കൈപ്പറ്റി പാർട്ടി പണി ചെയ്യാമെന്ന് കരുതരുത്. അത് ഈ നാട് ഇത്രകാലവും അനുവർത്തിച്ച് വരുന്ന മര്യാദയുടെ ലംഘനമാണ്. മാത്രവുമല്ല സർക്കാർ ജീവനക്കാരൻ ആയിട്ടും പാർട്ടിയുടെ അടിമ ആയിരുന്നു താങ്കൾ എന്ന തിരിച്ചറിവ് ഭാര്യക്കും മക്കൾക്കും ഉണ്ടാക്കുന്ന അവമതിപ്പ് വളരെ വലുതായിരിക്കുമെന്നും സന്ദീപ് വാചസ്പതി ഫേസ്ബുക്കിൽ കുറിച്ചു.