ഇമ്രാൻ ഖാനെ മലർത്തിയടിക്കാൻ പുതിയ ഫോർമുലയുമായി ഷെഹ്ബാസ് ഷെരീഫ്; പ്രതിസന്ധികാലത്ത് നവാസിനെ തിരിച്ചുവിളിച്ച് പാകിസ്ഥാൻ മുസ്ലിം ലീഗ്; വരുന്ന തെരഞ്ഞെടുപ്പിൽ പ്രധാനമന്ത്രി സ്ഥാനാർത്ഥിയായി പാർട്ടിയെ നയിക്കും

ഇസ്ലാമാബാദ്: മുൻ പാക് പ്രധാനമന്ത്രി നവാസ് ഷെരീഫ് രാജ്യത്ത് തിരിച്ചെത്തിയേക്കുമെന്നും വീണ്ടും പ്രധാനമന്ത്രിയായേക്കുമെന്നും സൂചന. സഹോദരൻ ഷെഹ്ബാസ് ഷെരീഫാണ് നിലവിൽ പ്രധാനമന്ത്രി. ഷെഹ്ബാസ് ഷെരീഫ് തന്നെയാണ് നവാസ് തിരിച്ചുവരണമെന്നും പ്രധാനമന്ത്രി പദം ഏറ്റെടുക്കണമെന്നും ആഗ്രഹം പ്രകടിപ്പിച്ചത്. പാകിസ്ഥാൻ മുസ്ലിം ലീഗിന്റെ സെൻട്രൽ ജനറൽ കൗൺസിൽ യോഗത്തിലാണ് ഷെഹ്ബാസ് ഈ ആവശ്യം ഉന്നയിച്ചത്. മുതിർന്ന നേതാക്കളുടെ പിന്തുണയും ഇതിനുണ്ടായിരുന്നു. പാർട്ടി സെൻട്രൽ ജനറൽ കൗൺസിൽ യോഗം നിലവിലെ പ്രധാനമന്ത്രി ഷെഹ്ബാസ് ഷെരീഫിനെ പാർട്ടിയുടെ പ്രെസിഡന്റായി തെരഞ്ഞെടുത്തിരുന്നു. നാട്ടിൽ തിരികെയെത്തി പാർട്ടിയെ നവാസ് നയിക്കണമെന്നും വിജയിച്ച് നാലാം തവണയും പ്രധാനമന്ത്രിയാകണമെന്നുമാണ് പാർട്ടിയിലെ ഭൂരിഭാഗം പേരും ആഗ്രഹിക്കുന്നതെന്ന് ചില പാകിസ്ഥാനി മാദ്ധ്യമങ്ങൾ റിപ്പോർട്ട് ചെയ്തിട്ടുണ്ട്.

നവാസ് ഷെരീഫ് മടങ്ങിയെത്തേണ്ടതിന്റെ ആവശ്യകത ഷഹബാസ് യോഗത്തിൽ എടുത്തുപറഞ്ഞിരുന്നു. ഈ പ്രതിസന്ധി ഘട്ടത്തിൽ അദ്ദേഹത്തിന്റെ നേതൃത്വം രാജ്യത്തിന് ആവശ്യമുണ്ട്. പാകിസ്ഥാൻ മുസ്ലിം ലീഗിന് യുവ നേതൃത്വം ആവശ്യമുണ്ടെന്നും നവാസ് ഷെരീഫിന്റെ മകൾ മറിയം ഷെരീഫിന്റെ പ്രവർത്തനങ്ങൾ അഭിനന്ദനീയമെന്നും നവാസിന്റെ വരവോടെ രാജ്യത്തിൻറെ രാഷ്ട്രീയ കാലാവസ്ഥയിൽ വലിയ മാറ്റമുണ്ടാകുമെന്നും ഷെഹ്ബാസ് ഷെരീഫ് കൂട്ടിച്ചേർത്തു. രാജ്യം നേരിടുന്ന രാഷ്ട്രീയ അസ്ഥിരാവസ്ഥയും സാമ്പത്തിക പ്രതിസന്ധിയും തരണം ചെയ്യാൻ നവാസിന്റെ തിരിച്ചുവരവ് സഹായിക്കുമെന്നതിൽ പാർട്ടിയിൽ ഇന്ന് വ്യത്യസ്ത അഭിപ്രായങ്ങളില്ല. അൽ അസീസിയ അഴിമതിക്കേസുമായി ബന്ധപ്പെട്ട് ഏഴുവർഷത്തെ തടവുശിക്ഷ അനുഭവിക്കവേയാണ് കോടതിയുടെ പ്രത്യേക അനുമതി പ്രകാരം നാലാഴ്ചത്തേക്ക് ചികിത്സാർത്ഥം നവാസ് ഷെരീഫ് ലണ്ടനിലേക്ക് പോയത്. പക്ഷെ വിവിധ കാരണങ്ങൾ ചൂണ്ടിക്കാട്ടി അദ്ദേഹം പാകിസ്ഥാനിലേക്ക് തിരിച്ചുവരാതെ ലണ്ടനിൽ തുടരുകയായിരുന്നു.