നയൻതാര-വിഘ്നേഷ് ശിവൻ വിവാഹ വീഡിയോ: ബിയോണ്ട് ദ് ഫെയറി ട്രെയിലർ പുറത്ത് വിട്ട് നെറ്റ്ഫ്ലിക്സ്

തെന്നിന്ത്യൻ സിനിമ ലോകം ഒന്നടങ്കം ആകാംക്ഷയോടെ കാത്തിരിപ്പിലാണ് നയൻതാരയുടേയും വിഘ്നേഷിന്റേയും വിവാഹ വീഡിയോയ്ക്കായി. ജൂൺ 9 ന് ചെന്നൈ മഹാബലിപുരത്തു വച്ച് നടന്ന വിവാഹത്തിൽ പ്രമുഖ താരങ്ങൾ പങ്കെടുത്തിരുന്നു. വലിയ ആഢംബരത്തോടെ നടന്ന വിവാഹത്തിൽ ഷാരൂഖ് ഖാൻ, രജനീകാന്ത്, തമിഴ്നാട് മുഖ്യമന്ത്രി എം.കെ സ്റ്റാലിൻ, എ.ആർ റഹ്മാൻ അടക്കം നിരവധി പേരാണ് പങ്കെടുത്തത്. വിവാഹം കാണാൻ ആഗ്രഹിക്കുന്നവർക്കായി മുഴുവൻ ചടങ്ങുകളും ഡോക്യുമെന്ററി പോലെ നെറ്റ്ഫ്ലീക്സ് സ്ട്രീം ചെയ്യുമെന്ന വിവരം നേരത്തേ പുറത്തുവന്നിരുന്നു.

വിഘ്നേഷ്- നയൻതാര വിവാഹം ഉടനെ പ്രേക്ഷകരിലേക്ക് എത്തുമെന്ന സൂചനയാണ് ഇപ്പോൾ പുറത്തുവന്നിരിക്കുന്നത്. നയൻതാര ബിയോണ്ട് ദ് ഫെയറി ടെയിൽ എന്നാണ് ഡോക്യുമെന്ററിയുടെ പേര്. വിവാഹത്തിന്റെ ടീസർ പുറത്തുവിട്ടിരിക്കുകയാണ് നെറ്റ്ഫ്ലിക്സ്. നെറ്റ്ഫ്ലിക്സിന്റെ ഔദ്യോഗിക ഇൻസ്റ്റഗ്രാം പേജിലാണ് വീഡിയ പങ്കുവച്ചിരിക്കുന്നത്.

റൗഡി പിക്ചേഴ്സിന്റെ ബാനറിൽ ഗൗതം മേനോനാണ് വിവാഹ ഡോക്യുമെന്ററി തയ്യാറാക്കിയിരിക്കുന്നത്. എന്തായാലും ഇത്രയും നാളത്തെ കാത്തിരിപ്പിന് ഒരു ഫലമുണ്ടായല്ലോ എന്നാണ് ടീസർ കണ്ട് ആരാധകർ ഒന്നടങ്കം പറയുന്നത്. ഇനി എത്രയും പെട്ടെന്ന് മുഴുവൻ വീ‍ഡിയോയും പുറത്തുവിടണമെന്നും ചിലർ ആവശ്യപ്പെട്ടിട്ടുണ്ട്. എന്നാൽ ഡോക്യുമെന്ററിയുടെ റിലീസ് തീയതി ഇതുവരെ പുറത്തുവന്നിട്ടില്ല.