രാഹുലിന് നേരെ ചീമുട്ട എറിയും : രാംദാസ് അഠാവാല

ദില്ലി : പ്രധാനമന്ത്രി നരേന്ദ്ര മോദിയെ രാജ്യത്തെ യുവജനം വടികൊണ്ട് അടിക്കുമെന്ന കോണ്‍ഗ്രസ് നേതാവ് രാഹുല്‍ ഗാന്ധിയുടെ പരാമര്‍ശത്തിനെതിരെ കേന്ദ്രമന്ത്രി രാംദാസ് അഠാവാല. രാഹുല്‍ ഗാന്ധി പ്രധാനമന്ത്രിയെ വടികൊണ്ട് അടിച്ചാല്‍ ഞങ്ങള്‍ അദ്ദേഹത്തിനു നേരെ മുട്ട എറിയുമെന്ന് അഠാവാല പറഞ്ഞു.

രാഹുലിന്റെ ഇത്തരം പ്രസ്താവനകള്‍കൊണ്ടാണ് അദ്ദേഹം അമേഠിയില്‍ തോറ്റതെന്നും രാഹുല്‍ രാജ്യത്തിന് നിരാശ മാത്രമാണ് സമ്മാനിക്കുന്നതെന്നും അദ്ദേഹം പറഞ്ഞു.കൂടാതെ കോണ്‍ഗ്രസ് പാര്‍ട്ടിയുടെ അന്തകനാണെന്നും അഠാവാല കൂട്ടിച്ചേര്‍ത്തു. രാഹുലിന്റെ പ്രസ്താവനക്കെതിരെ നരേന്ദ്രമോദി തന്നെ രംഗത്ത് വന്നിരുന്നു. ആറ് മാസത്തിനുള്ളില്‍ തന്നെ അടിക്കുമെന്ന് ഒരു കോണ്‍ഗ്രസ് നേതാവ് പറഞ്ഞുവെന്നും അടി കൊള്ളാന്‍ സൂര്യനമസ്‌കാരം ചെയ്ത് തന്റെ ശരീരത്തെ തയാറാക്കുമെന്നും പ്രധാനമന്ത്രി പറഞ്ഞിരുന്നു.

പ്രധാനമന്ത്രി ഇപ്പോള്‍ പ്രസംഗിച്ച് നടക്കുകയാണെന്നും ആറ് മാസം കഴിഞ്ഞാല്‍ രാജ്യത്തെ യുവജനം മോദിയെ വടികൊണ്ട് അടിക്കുമെന്നും തൊഴിലില്ലായ്മ പരിഹരിക്കാതെ രാജ്യത്തിന് മുന്നോട്ട് പോകാനാകില്ലെന്ന് ബോധ്യപ്പെടുത്തുമെന്നുമായിരുന്നു രാഹുലിന്റെ പ്രസ്താവന. രാഹുലിന്റെ ഈ പ്രസ്താവനക്കെതിരെ പല നേതാക്കളും രംഗത്ത് വന്നിരുന്നു.