നിങ്ങൾ എത്രമാത്രം ചെളി എറിയുന്നുവോ,അത്രയേറെ താമര വിരിയും: പ്രതിപക്ഷത്തിന്റെ വായടപ്പിച്ച് രാജ്യസഭയിൽ നരേന്ദ്ര മോദി

ദില്ലി : രാജ്യസഭയിൽ പ്രധാനമന്ത്രി നരേന്ദ്ര മോദിയുടെ പ്രസംഗം നടുത്തളത്തിലിറങ്ങി പ്രതിഷേധിച്ച് സ്തംഭിപ്പിക്കാൻ പ്രതിപക്ഷ ശ്രമം. എത്രമാത്രം ചെളി വാരിയെറിയുന്നോ അത്രയധികം താമര വിരിയുമെന്നു മോദി സൗമ്യനായി പ്രതികരിച്ചത്. മോദിയും ഹിന്ദൻബർഗ് വിവാദത്തിൽ കാലിടറിയ ഗൗതം അദാനിയും സഹോദരങ്ങളാണെന്ന മുദ്രാവാക്യം ഉയര്‍ത്തിയാണു പ്രതിപക്ഷം പ്രതിഷേധം സംഘടിപ്പിച്ചത്. പ്രതിപക്ഷത്തിന്റെ പെരുമാറ്റം രാജ്യതാല്‍പര്യത്തിന് എതിരാണെന്നു മോദി വിമര്‍ശിച്ചു.

കലബുറഗി സന്ദര്‍ശനത്തിനെതിരെ നിലപാടെടുത്ത മല്ലികാര്‍ജുന്‍ ഖര്‍ഗെയെ മോദി വിമർശിച്ചു. സന്ദർശന ഫലമായി കലബുറഗിയില്‍ 8 ലക്ഷം ജന്‍ധന്‍ അക്കൗണ്ടുകള്‍ തുറക്കാൻ സാധിച്ചു. ജനങ്ങള്‍ ശാക്തീകരിക്കപ്പെട്ടപ്പോള്‍ ചിലരുടെ അക്കൗണ്ടുകള്‍ പൂട്ടി. അവരുടെ വേദന തനിക്ക് മനസ്സിലാകും. പ്രതിപക്ഷത്തിന്റെ പ്രതിഷേധം ദൗർഭാഗ്യകരമാണ്. കോൺഗ്രസ് കുടുംബം രാജ്യത്തെ തകർത്തുവെന്നും നയപ്രഖ്യാപനത്തിനുള്ള നന്ദിപ്രമേയ ചര്‍ച്ചയില്‍ പ്രധാനമന്ത്രി പ്രതിപക്ഷത്തെ കടന്നാക്രമിച്ചു.

അതെ സമയം ഇന്നലെ രാഹുലിന്റെ പരാമർശം നീക്കിയതിനു പിന്നാലെ അദാനി–മോദി ബന്ധത്തെക്കുറിച്ചു ഖര്‍ഗെ നടത്തിയ പരാമര്‍ശങ്ങളും രാജ്യസഭാ രേഖകളില്‍നിന്ന് നീക്കി. മോദിയെ ‘മൗനി ബാബ’യെന്നു ഖർഗെ വിശേഷിപ്പിച്ചതാണ് സഭയിൽ ഭരണപക്ഷത്തിന്റെ പ്രതിഷേധത്തിനിടയാക്കിയത്. കോൺഗ്രസ് അദ്ധ്യക്ഷന്റെ പരാമർശം പ്രതിപക്ഷ നേതാവിന്റെ സ്ഥാനത്തിനു ചേർന്നതല്ലെന്നു രാജ്യസഭാദ്ധ്യക്ഷൻ ജഗ്ദീപ് ധൻകർ പറഞ്ഞു.