മരിച്ചിട്ടില്ല … ട്രമ്പിന്റെ മറുപടിയുമായി ഇറാന്റെ പുതിയ പരമോന്നത നേതാവ്; മൊജ്തബ ഖമനൈയിയുടെ രഹസ്യ സന്ദേശം പുറത്ത്

ഇറാന്റെ പുതിയ പരമോന്നത നേതാവ് മോജ്തബ ഖമനേയി ജീവിച്ചിരിപ്പുണ്ടോ എന്ന കാര്യത്തിൽ അമേരിക്കൻ പ്രസിഡന്റ് ഡൊണാൾഡ് ട്രമ്പ് സംശയം പ്രകടിപ്പിച്ചതിന് പിന്നാലെ, ഇറാഖിലെ ജനങ്ങൾക്ക് നന്ദി അറിയിച്ചുകൊണ്ടുള്ള മൊജ്തബയുടെ പുതിയ സന്ദേശം പുറത്ത്. അമേരിക്കയ്‌ക്കെതിരായ യുദ്ധത്തിൽ ഇറാന് നൽകുന്ന പിന്തുണയ്ക്കാണ് ഇറാഖി ജനതയ്ക്കും അവിടുത്തെ ഷിയാ മതനേതാവ് അയത്തുള്ള അലി സിസ്താനിക്കും അദ്ദേഹം നന്ദി അറിയിച്ചത്.

കഴിഞ്ഞ ഫെബ്രുവരി 28-ന് വ്യോമാക്രമണത്തിൽ കൊല്ലപ്പെട്ട അലി ഖമനൈയിയുടെ മകനായ മൊജ്തബ , സ്ഥാനമേറ്റെടുത്ത ശേഷം ഇതുവരെ പൊതുവേദിയിൽ പ്രത്യക്ഷപ്പെട്ടിട്ടില്ല. ഇതാണ് മൊജ്തബ കൊല്ലപ്പെടുകയോ ഗുരുതരമായി പരിക്കേൽക്കുകയോ ചെയ്തിട്ടുണ്ടാകാമെന്ന ട്രമ്പിന്റെ പ്രസ്താവനയ്ക്ക് ആധാരം. എന്നാൽ വ്യോമാക്രമണത്തിൽ ഏറ്റ പരിക്കുകളിൽ നിന്ന് മൊജ്തബ സുഖം പ്രാപിച്ചുവരികയാണെന്നും അതുകൊണ്ടാണ് നേരിട്ട് പ്രത്യക്ഷപ്പെടാത്തതെന്നുമാണ് ഇറാന്റെ ഔദ്യോഗിക വിശദീകരണം.

ഇറാഖിലെ ഇസ്ലാമിക് സുപ്രീം കൗൺസിലും ബാഗ്ദാദിലെ ഇറാൻ അംബാസഡറും തമ്മിലുള്ള കൂടിക്കാഴ്ചയ്ക്ക് ശേഷമാണ് ഈ രേഖാമൂലമുള്ള സന്ദേശം പുറത്തുവിട്ടത്. യുദ്ധത്തിൽ ഇറാന്റെ വിജയം ഉറപ്പാണെന്ന് സന്ദേശത്തിൽ മൊജ്തബ ആവർത്തിച്ചു. ടെലിവിഷൻ ചാനലുകളിലൂടെയും സോഷ്യൽ മീഡിയ അക്കൗണ്ടുകളിലൂടെയും മോജ്തബയുടെ സന്ദേശങ്ങൾ പ്രചരിക്കുന്നുണ്ടെങ്കിലും, അദ്ദേഹത്തിന്റെ നിലവിലെ ആരോഗ്യസ്ഥിതിയെക്കുറിച്ചുള്ള ദുരൂഹതകൾ പാശ്ചാത്യ രാജ്യങ്ങൾക്കിടയിൽ ഇപ്പോഴും തുടരുകയാണ്.