നഗ്നദൃശ്യം ചിത്രീകരിച്ച് പ്രചരിപ്പിച്ചു; തമിഴ്‌നാട്ടിൽനിന്ന് സ്ത്രീകളെത്തി വ്‌ളോഗർ മുഹമ്മദലി ജിന്നയെ കെട്ടിയിട്ട് തല്ലി

പാലക്കാട്: വാട്‌സാപ് ഗ്രൂപ്പിലെ സ്ത്രീകളുടെ ഫോട്ടോ മോര്‍ഫ് ചെയ്ത് അശ്ലീലച്ചിത്രങ്ങളാക്കി സമൂഹമാദ്ധ്യമങ്ങളിലൂടെ പ്രചരിപ്പിച്ച വ്‌ളോഗറെ തമിഴ്‌നാട്ടില്‍നിന്ന് എത്തിയ സ്ത്രീകള്‍ കെട്ടിയിട്ട് തല്ലി. പാലക്കാട് കോട്ടത്തറ ചന്തക്കട സ്വദേശി മുഹമ്മദലി ജിന്നയ്ക്കാണ് മര്‍ദ്ദനമേറ്റത്. സേലം, തൃച്ചി, സൂലൂര്‍ എന്നിവിടങ്ങളില്‍ നിന്നെത്തിയ സ്ത്രീകളാണ് വ്‌ളോഗറുടെ കയ്യും കാലും കെട്ടിയിട്ട് മർദ്ദിച്ചത്.

മർദ്ദന വിവരമറിഞ്ഞ് അഗളി പോലീസ് സ്ഥലത്തെത്തുകയും മുഹമ്മദലി ജിന്നയെ ആശുപത്രിയിലേക്ക് മാറ്റുകയും ചെയ്തു. പ്രതിക്ക് കാര്യമായി മർദ്ദനമേറ്റിരുന്നു. വസ്ത്ര വില്‍പ്പനയുമായി ബന്ധപ്പെട്ട വാട്‌സാപ്പ് ഗ്രൂപ്പിൽ മുഹമ്മദലി ജിന്നയും അംഗമായിരുന്നു. ഈ ഗ്രൂപ്പിൽവന്ന സ്ത്രീകളുടെ ഫോട്ടോയും വിവരങ്ങളുമാണ് മുഹമ്മദലി ജിന്ന മോർഫ് ചെയ്ത് സമൂഹമാദ്ധ്യമങ്ങളിൽ പോസ്റ്റ് ചെയ്തതായി സ്ത്രീകൾ പറയുന്നു. നേരത്തെയും ഇയാള്‍ക്കെതിരെ സമാന പരാതി ഉയര്‍ന്നിട്ടുണ്ടെന്നും പോലീസ് പറഞ്ഞു. സ്ത്രീകളുടെ പരാതിയില്‍ അഗളി പോലീസ് കേസെടുത്തു.