അമരാവതിയിൽ നൂപുർ ശർമ്മയെ പിന്തുണച്ച ഒരാൾ കൂടി കൊല്ലപ്പെട്ടു;സംഭവത്തിൽ എൻ.ഐ.എ അന്വേഷണം ആരംഭിച്ചു

പ്രവാചക വിരുദ്ധ പരാമർശം നടത്തി വിവാദത്തിലായ ബിജെപി മുൻ വക്താവ് നൂപുർ ശർമ്മയെ പിന്തുണച്ച ഒരാൾ കൂടി കൊല്ലപ്പെട്ടു.
മഹാരാഷ്ട്രയിലെ അമരാവതിയിലാണ് സംഭവം. നൂപുർ ശർമ്മയെ പിന്തുണച്ച് സോഷ്യൽ മീഡിയയിൽ പോസ്റ്റ് ഇട്ടതിനാണ് 54കാരനായ മെഡിക്കൽ സ്റ്റോർ ഉടമയെ കുത്തിക്കൊന്നതെന്നാണ് സംശയം. രാജസ്ഥാനിലെ ഉദയ്പൂരിൽ തയ്യൽക്കാരനായ കനയ്യ ലാലിനെ രണ്ട് പേർ വെട്ടിക്കൊലപ്പെടുത്തുന്നതിന് ഒരാഴ്ച മുമ്പ്, ജൂൺ 21 ന് അമരാവതിയിൽ മരുന്ന് വ്യാപാരിയായ ഉമേഷ് പ്രഹ്ലാദ് റാവു കോൽഹെയെ കുത്തിക്കൊലപ്പെടുത്തിയത്. സംഭവത്തെക്കുറിച്ച് എൻഐഎ അന്വേഷണം ആരംഭിച്ചിട്ടുണ്ട്.

“കൊൽഹെ അമരാവതി നഗരത്തിൽ ഒരു മെഡിക്കൽ സ്റ്റോർ നടത്തിയിരുന്നു. നൂപൂർ ശർമ്മയെ പിന്തുണച്ച് ചില വാട്ട്‌സ്ആപ്പ് ഗ്രൂപ്പുകളിൽ ഒരു പോസ്റ്റ് ഷെയർ ചെയ്തതായി ആരോപിക്കപ്പെടുന്നു. തന്റെ കസ്റ്റമേഴ്‌സ് ഉൾപ്പെടെ എല്ലാ മതവിശ്വാസികളും അംഗങ്ങളായ ഒരു വാട്ട്‌സ്ആപ്പ് ഗ്രൂപ്പിൽ അദ്ദേഹം പോസ്റ്റ് ഷെയർ ചെയ്യുകയും ചെയ്തതായി സിറ്റി കോട്വാലി പോലീസ് സ്റ്റേഷനിലെ ഒരു ഉദ്യോഗസ്ഥൻ പിടിഐയോട് പറഞ്ഞു. എൻഐഎ സംഘം അമരാവതിയിൽ എത്തിയിട്ടുണ്ടെന്നും അന്വേഷണം ഏറ്റെടുക്കുമെന്നും ആഭ്യന്തരമന്ത്രാലയം അറിയിച്ചു. എൻ ഐ എ സംഘം വിഷയം പരിശോധിച്ച് മഹാരാഷ്ട്ര പോലീസിൽ നിന്ന് വിശദാംശങ്ങൾ വാങ്ങിയിട്ടുണ്ട്.