മസ്തിഷ്ക മരണമെന്ന് റിപ്പോർട്ട് നൽകി അവയവദാനം; കേസിലെ പ്രതിപ്പട്ടിക പുറത്ത്

ഇടുക്കി ഉടുമ്പൻചോല സ്വദേശി എബിൻ വാഹനാപകടത്തിൽ മരിച്ചെന്ന് റിപ്പോർട്ട് നൽകി അവയവങ്ങൾ ദാനം ചെയ്‌തെന്ന പരാതിയിൽ കൊച്ചിയിലെ ലേക് ഷോർ ആശുപത്രിക്കും ആശുപത്രിയിലെ 8 ഡോക്ടർമാർക്കെതിരെ കേസെടുക്കാൻ എറണാകുളം ഫസ്റ്റ് ക്ലാസ് ജുഡീഷ്യൽ കോടതി ഉത്തരവിട്ടതിന് പിന്നാലെ പ്രതിപട്ടിക പുറത്ത് വന്നു . കൊച്ചിയിലെ ലേക് ഷോർ ആശുപത്രിയാണ് പ്രതിപട്ടികയിൽ ഒന്നാമത്.

സീനിയർ ഗ്യാസ്ട്രോഎൻട്രോളജിസ് ഡോ. ഫിലിപ്പ് അഗസ്റ്റിൻ, സർജിക്കൽ ഗ്യാസ്ട്രോഎൻട്രോളജിസ് ഡോ.എസ് മഹേഷ്, സർജിക്കൽ ഗ്യാസ്ട്രോഎൻട്രോളജി സീനിയർ കൺസൾട്ടന്റ് ഡോ.ജോർജ് ജേക്കബ് എറാലി, ന്യൂറോ സർജൻ ഡോ.സായി സുദർശൻ, മെഡിക്കൽ സൂപ്രണ്ടന്റ് ഡോ. തോമസ് തച്ചിൽ, ന്യൂറോളജിസ്റ്റ് ഡോ.മുരളി കൃഷ്ണ മേനോൻ, കൺസൾട്ടന്റ് ഫിസിഷ്യൻ ഡോ.സുജിത്ത് വാസുദേവൻ, ന്യൂറോ സർജൻ ഡോ .സജീവ് എസ് വടക്കേടൻ എന്നിവരാണ് പ്രതിപട്ടികയിലെ മറ്റുള്ളവർ

സംഭവത്തിൽ ദൂരൂഹത ആരോപിച്ച് കൊല്ലം സ്വദേശി ഡോ. ഗണപതിയാണ് എറണാകുളം ഫസ്റ്റ് ക്ലാസ് മജിസ്ട്രേറ്റ് കോടതിയെ സമീപിച്ചത്. 2009 നവംബർ 29 നാണ് വി ജെ എബിനെ ബൈക്ക് അപകടത്തെ തുടർന്ന് ഗുരുതരാവസ്ഥയില്‍ കോതമംഗലം മാർ ബസേലിയോസ് ആശുപത്രിയിൽ പ്രവേശിപ്പിച്ചത്. തൊട്ടടുത്ത ദിവസം വിദഗ്ധ ചികിത്സയ്ക്കായി എബിനെ ലേക് ഷോര്‍ ആശുപത്രിയിലേക്ക് മാറ്റി. തൊട്ടടുത്ത ദിവസം തന്നെ മസ്തിഷ്ക മരണം സംഭവിച്ചെന്ന് വ്യക്തമാക്കി ഡോക്ടർമാർ അവയവദാനം നടത്തുകയായിരുന്നു.

യുവാവിനെ ചികിത്സയ്ക്കായി എത്തിച്ച രണ്ട് ആശുപത്രികളും, രക്തം തലയിൽ കട്ട പിടിച്ചാൽ തലയോട്ടിയിൽ സുഷിരമുണ്ടാക്കി ഇത് തടയണമെന്ന പ്രാഥമിക ചികിത്സ നൽകിയില്ലെന്നാണ് പരാതിക്കാരൻ കോടതിയെ അറിയിച്ചത്. യുവാവിന്റെ അവയവങ്ങൾ ദാനം ചെയ്തതിൽ അവയവദാനത്തിന്‍റെ നടപടി ക്രമങ്ങൾ ഒന്നും പാലിച്ചില്ലെന്നും അദ്ദേഹം ആരോപിച്ചിരുന്നു. രക്തം കട്ട പിടിക്കാതിരിക്കാനുള്ള ചികിത്സ രണ്ട് ആശുപത്രികളും യുവാവിന് നൽകിയതായി രേഖകളിലില്ലെന്ന് കോടതിയില്‍ വ്യക്തമാക്കി. ഇതുകൂടാതെ ഒരു വിദേശിക്ക് അവയവം നൽകിയ നടപടി ക്രമങ്ങളിലും അപാകതയുണ്ടന്നും കോടതി നിരീക്ഷിച്ചു.