ബംഗ്ലാദേശ് കലാപത്തിന് പിന്നിൽ പാകിസ്ഥാൻ ഐഎസ്ഐ; തെളിവുകൾ നിരത്തി ഷെയ്ഖ് ഹസീനയുടെ മകൻ

ധാക്ക: ബംഗ്ലാദേശ് കലാപത്തിന് പിന്നിൽ പാകിസ്ഥാൻ ചാരസംഘടനായ ഐ.എസ്.ഐ ആണെന്ന് ഷെയ്ഖ് ഹസീനയുടെ മകൻ സജീബ് വാസെദ് ജോയ്. ആക്രമണത്തിന് പിന്നിൽ ഐ.എസ്.ഐയുടെ ഇടപെടലുകൾ ഉണ്ടെന്നും അതിനുള്ള തെളിവുകൾ ഉണ്ടെന്നും അദ്ദേഹം പറഞ്ഞതായി മാദ്ധ്യമങ്ങൾ റിപ്പോർട്ട് ചെയ്തു.

‘ബംഗ്ലാദേശിലെ കലാപത്തിന് പിന്നിൽ പാകിസ്ഥാൻ ചാരസംഘടനായ ഐ.എസ്.ഐ ആണ്. സാഹചര്യതെളിവുകൾ കണക്കിലെടുക്കുമ്പോൾ എനിക്ക് അതിൽ ഉറപ്പുണ്ട്. ബംഗ്ലാദേശിൽ ഉണ്ടായ ആക്രമണങ്ങളും പ്രതിഷേധങ്ങളും വളരെ ഏകോപിതവും സൂക്ഷ്മമായി ആസൂത്രണം ചെയ്തതുമാണ്. സോഷ്യൽ മീഡിയയിലൂടെ അവിടുത്തെ കലാപ സാഹചര്യം ആളിക്കത്തിക്കാനുള്ള മനഃപൂർവമായ ശ്രമങ്ങളുമുണ്ടായിരുന്നു,’ എന്ന് ജോയ് പറഞ്ഞു. സ്ഥിതിഗതികൾ നിയന്ത്രിക്കാൻ സർക്കാർ എന്തുതന്നെ ചെയ്‌താലും അത് കൂടുതൽ വഷളാക്കാൻ ഐ.എസ്.ഐ ശ്രമിച്ചുകൊണ്ടിരുന്നെന്നും അദ്ദേഹം കൂട്ടിച്ചേർത്തു. പോലീസിനെ ആക്രമിക്കാൻ കലാപകാരികൾ ഉപയോഗിച്ച തോക്കുകൾ തീവ്രവാദ സംഘടനകൾക്കും വിദേശ ശക്തികൾക്കും മാത്രം നൽകാൻ കഴിയുന്ന തരത്തിലുള്ളവയായിരുന്നു എന്നും അദ്ദേഹം പറഞ്ഞു.

പ്രധാനമന്ത്രി സ്ഥാനം രാജിവച്ചതിന് പിന്നാലെ ഓഗസ്റ്റ് 5 നാണ് ഷെയ്ഖ് ഹസീന ഇന്ത്യയിലെത്തിയത്. നിർണായകഘട്ടത്തിൽ തന്റെ അമ്മയ്ക്ക് സംരക്ഷണം നൽകിയതിന് പ്രധാനമന്ത്രി നരേന്ദ്ര മോദിയോട് സജീബ് നന്ദി പ്രകടിപ്പിച്ചു.