പാകിസ്ഥാനിൽ മിസൈൽ വീണ ദിവസം ഇന്ത്യയെ ആക്രമിക്കാൻ അവർ പദ്ധതിയിട്ടിരുന്നു: എന്നാൽ?

ദില്ലി: പാക് അതിർത്തി ഭേദിച്ച് ഇന്ത്യയിൽ നിന്നും മിസൈൽ വിക്ഷേപിച്ച സംഭവത്തിൽ പാകിസ്ഥാൻ തിരിച്ചടിക്ക് ഒരുങ്ങിയതായി റിപ്പോർട്ട്. ഈ മാസം 9 ന് ഇന്ത്യയുടെ സൂപ്പര്‍സോണിക് മിസൈല്‍ അബദ്ധത്തിൽ പാകിസ്ഥാനില്‍ പതിച്ചത്.

ഇന്ത്യൻ മിസൈൽ വാസയോഗ്യമല്ലാത്ത സ്ഥലത്ത് വീണതിനാൽ, ആളപായമുണ്ടായിരുന്നുമില്ല. എന്നാൽ ഇതിനു പിന്നാലെ പകരത്തിന് പകരമായി പാകിസ്ഥാന്‍ ഇന്ത്യയെ ആക്രമിക്കാന്‍ പദ്ധതിയിട്ടിരുന്നതായാണ് ബ്ലൂംബെര്‍ഗ് റിപ്പോര്‍ട്ട് ചെയ്യുന്നത്.

ഇന്ത്യ ബോധപൂർവ്വം മിസൈൽ വിട്ടതാണെന്ന് കരുതി പാകിസ്ഥാൻ പ്രത്യാക്രമണത്തിന് തയ്യാറായിരുന്നു. എന്നാൽ തിരിച്ചടിക്കാനുള്ള ശ്രമങ്ങൾക്കിടയിൽ ഇപ്പോൾ തിരിച്ചടിച്ചാൽ കുഴപ്പമാകുമെന്ന് പാക് സൈന്യത്തിലെ മുതിർന്ന ഉദ്യോഗസ്ഥർ മുന്നറിയിപ്പ് നൽകിയതിനെ തുടർന്നാണ് പ്രത്യാക്രമണത്തിനായുള്ള ശ്രമം ഉപേക്ഷിച്ചതെന്നാണ് റിപ്പോർട്ട്.

അതേസമയം അബദ്ധത്തിൽ മിസൈൽ വിക്ഷേപിച്ചതിനെ കുറിച്ച് കഴിഞ്ഞ ദിവസം പ്രതിരോധ മന്ത്രി രാഥ്നാഥ് സിംഗ് പാർലമെന്റിൽ വിശദീകരിച്ചിരുന്നു. ഇതിന് പിന്നാലെയാണ് പാക് നീക്കത്തെ കുറിച്ചുള്ള റിപ്പോർട്ട് പുറത്ത് വന്നത്. കഴിഞ്ഞ ദിവസം ഇന്ത്യയുടെ മിസൈൽ അബദ്ധത്തിൽ പാക്കിസ്ഥാനിൽ പതിക്കാനിടയായ സംഭവത്തെക്കുറിച്ച് ഉന്നത തലത്തിൽ സമഗ്ര അന്വേഷണം നടക്കുകയാണെന്ന് പ്രതിരോധ മന്ത്രി രാജ്നാഥ് സിങ് പാർലമെന്റിനെ അറിയിച്ചു. സംഭവത്തിൽ ഇന്ത്യ ഖേദം പ്രകടിപ്പിക്കുകയും ചെയ്തു.