“സന്ദീപ് വാര്യർ ബിജെപിയിൽ നിന്ന് പോയതിൽ പാർട്ടിയ്ക്ക് യാതൊരു ക്ഷീണവുമില്ല !” ഇരുപതാം തീയതി തെരഞ്ഞെടുപ്പ് കഴിഞ്ഞാൽ സന്ദീപിനെ കോൺഗ്രസ് കറിവേപ്പിലയാക്കുമെന്ന് സി കൃഷ്ണകുമാർ

പാലക്കാട് : സന്ദീപ് വാര്യരുടെ കോൺഗ്രസ് പ്രവേശനത്തിൽ പ്രതികരണവുമായി പാലക്കാട്ടെ ബിജെപി സ്ഥാനാർത്ഥി സി കൃഷ്ണകുമാർ. സന്ദീപ് പാർട്ടിയുടെ ഒരു വക്താവ് മാത്രമായിരുന്നുവെന്നും അതുകൊണ്ട് അദ്ദേഹം പോയാലും പാർട്ടിയ്ക്ക് ഒന്നും സംഭവിക്കില്ലെന്നും പറഞ്ഞ സി കൃഷ്ണകുമാർ ഇരുപതാം തിയതി തെരഞ്ഞെടുപ്പ് കഴിഞ്ഞാൽ സന്ദീപിനെ കോൺഗ്രസ് കറിവേപ്പിലയാക്കുമെന്നും തുറന്നടിച്ചു.

“സന്ദീപ് ബിജെപിയിൽ നിന്ന് പോയതിൽ പാർട്ടിയ്ക്ക് യാതൊരു ക്ഷീണവുമില്ല. സന്ദീപ് പാർട്ടി വിട്ടതിൽ സന്തോഷമേ ഉള്ളു. തലയ്ക്ക് അഹങ്കാരം പിടിച്ച് പോയവനെ പ്രവർത്തകർ ഉൾക്കൊള്ളില്ല. സന്ദീപ് പാർട്ടിയുടെ ഒരു വക്താവ് മാത്രമാണ്. അതുകൊണ്ട് അദ്ദേഹം പോയാലും പാർട്ടിയ്ക്ക് ഒന്നും സംഭവിക്കില്ല. സന്ദീപ് കോൺഗ്രസിൽ ഒരുപാട് കാലം നിൽക്കില്ല. തലയ്ക്ക് അഹങ്കാരം പിടിച്ച് പോയവനെ പാർട്ടിയുടെ പ്രവർത്തകർ ഉൾക്കൊള്ളില്ല. സന്ദീപ് പോയതിൽ യാതൊരു ദു:ഖവും ഇല്ല. സന്തോഷം മാത്രമേയുള്ളൂ. പലപാർട്ടികളുമായി സന്ദീപ് വിലപേശി. ഇതിൽ കൂടുതൽ വില കൊടുത്ത പാർട്ടിയിൽ ചേർന്നു. രണ്ട് ദിവസം മുൻപ് സന്ദീപ് ബംഗളൂരുവിൽ പോയിരുന്നു. പ്രത്യയശാസ്ത്രം തൂക്കി വിൽക്കുന്നതിന് വേണ്ടിയായിരുന്നു ഇത്. ഇരുപതാം തീയതി തെരഞ്ഞെടുപ്പ് കഴിഞ്ഞാൽ സന്ദീപിനെ കോൺഗ്രസ് കറിവേപ്പിലയാക്കും.”- സി കൃഷ്ണകുമാർ പറഞ്ഞു.