പാലക്കാട് മണ്ണാർക്കാട് ലോഡ്ജിൽ തീപ്പിടുത്തം; സ്ത്രീയടക്കം രണ്ടുപേർ വെന്തുമരിച്ചു

പാലക്കാട്: പാലക്കാട് മണ്ണാർക്കാട് ലോഡ്ജിൽ തീപിടുത്തം. മണ്ണാർക്കാട് നെല്ലിപ്പുഴയിലെ ഹോട്ടലിലാണ് തീപിടുത്തമുണ്ടായത്. സംഭവത്തിൽ സ്ത്രീയുൾപ്പെടെ രണ്ടുപേർ മരിച്ചു. പുലർച്ചെ മൂന്നേകാലോടെയാണ് തീപിടുത്തമുണ്ടായത്. സംഭവം അറിഞ്ഞ ഉടൻ തന്നെ അഗ്നിശമന സേന യൂണിറ്റുകളിലെത്തി തീയണച്ചു.

നാലുനിലകളുള്ള ഹോട്ടൽ ഹിൽവ്യൂവിലായിരുന്നു തീപടർന്നുപിടിച്ചത്. താഴത്തെ നിലയിൽ പ്രവർത്തിക്കുന്ന ഹോട്ടലിൽ നിന്നാണ് തീ പടർന്നതെന്നാണ് നിഗമനം. അപകടത്തില്‍ ഒരു സ്ത്രീയും പുരുഷനുമാണ് മരിച്ചത്. ലോഡ്ജിന്റെ മുകളിലത്തെ നിലയിൽ ഇരുവരും കുടുങ്ങിയിരുന്നു. ഇരുവരെയും ഫയർ ഫോഴ്‌സ് പുറത്തെത്തിച്ചെങ്കിലും ജീവന്‍ രക്ഷിക്കാനായില്ല. മരിച്ച രണ്ടുപേരും തൊഴിലാളികളാണ്. ഇവര്‍ മലപ്പുറം കോട്ടക്കല്‍ സ്വദേശികളാണ്. എന്നാല്‍ ഇവരുടെ മറ്റ് വിവരങ്ങള്‍ ലഭ്യമായിട്ടില്ല. അതേസമയം ലോഡ്ജിന്റെ മുകളിലത്തെ നിലയിൽ ഒരാൾ കുടുങ്ങിയിരുന്നു. ഇയാളെ ഫയർ ഫോഴ്‌സ് രക്ഷപ്പെടുത്തി. ഇയാൾക്ക്‌ ഗുരുതരമായി പൊള്ളലേറ്റിട്ടുണ്ടെന്നാണ് വിവരം.