പാർലമെന്റ് അതിക്രമം !അഞ്ച് പ്രതികളുടെ നുണപരിശോധനയ്ക്ക് അനുമതി നൽകി ദില്ലി കോടതി

പാർലമെന്റ് ആക്രമണത്തിന്റെ വാർഷിക ദിനത്തിൽ സ്‌മോക്ക് ബോംബുകൾ ഉപയോഗിച്ച് പുക പടര്‍ത്തി അതിക്രമമം നടത്തിയ സംഭവത്തിൽ പ്രതികളുടെ നുണപരിശോധനയ്ക്ക് അനുമതി നല്‍കി ദില്ലി കോടതി. ആറ് പ്രതികളില്‍ അഞ്ചുപേരെ നുണ പരിശോധനയ്ക്ക് വിധേയരാക്കാനാണ് അഡീഷണല്‍ സെഷന്‍സ് ജഡ്ജി ഹര്‍ദീപ് കൗര്‍ അനുമതി നല്‍കിയത്. ഇതിനൊപ്പം പ്രതികളുടെ കസ്റ്റഡി കാലാവധി കോടതി എട്ട് ദിവസത്തേക്ക് നീട്ടിനല്‍കുകയും ചെയ്തു.

മനോരഞ്ജന്‍, സാഗര്‍ ശര്‍മ, അമോല്‍ ഷിന്‍ഡേ, ലളിത് ഝാ, മഹേഷ് കുമാവത് എന്നീ അഞ്ച് പ്രതികളെയാണ് നുണപരിശോധനയ്ക്ക് വിധേയരാക്കാന്‍ കോടതി അനുമതി നല്‍കിയത്. പ്രതികളെ നുണ പരിശോധനയ്ക്ക് വിധേയരാക്കാൻ അനുവദിക്കണമെന്ന് പോലീസ് അപേക്ഷ സമർപ്പിച്ചിരുന്നു. പ്രതികളുടെ സമ്മതം തേടിയ ശേഷമായിരുന്നു കോടതിയുടെ ഉത്തരവ്. അതേസമയം പ്രതികളിലൊരാളായ നീലം ആസാദിനെ നുണ പരിശോധനയില്‍ നിന്ന് കോടതി ഒഴിവാക്കി.

ഇക്കഴിഞ്ഞ ഡിസംബര്‍ 13-നാണ് പാര്‍ലമെന്റില്‍ അതിക്രമ സംഭവം നടന്നത്. പാർലമെന്റ് ശൂന്യവേളയുടെ സമയത്ത് സാഗര്‍ ശര്‍മ്മ, മനോരഞ്ജന്‍ എന്നിവർ സന്ദര്‍ശക ഗ്യാലറിയില്‍ നിന്ന് ലോക്‌സഭാ ചേമ്പറിലേക്ക് ചാടിയിറങ്ങി മുദ്രാവാക്യം വിളിച്ചുകൊണ്ട് സ്‌മോക്ക് ബോംബുകൾ പൊട്ടിക്കുകയും ധനരഞ്ജ് ഷിന്‍ഡേ, നീലം ആസാദ് എന്നിവര്‍ പാര്‍ലമെന്റിന് പുറത്ത് സ്‌മോക്ക് ബോംബുകൾ പൊട്ടിച്ച് മുദ്രാവാക്യം വിളിക്കുകയുമായിരുന്നു.