മാറ്റത്തിന് വേണ്ടി ജനങ്ങൾ വോട്ട് ചെയ്തു ! ഉണ്ടായത് ജനാധിപത്യത്തിന്റെ വിജയം ; സതീശനോടുള്ള വിയോജിപ്പിൽ മാറ്റമില്ലെന്ന് സുകുമാരൻ നായർ

കോട്ടയം: കേരള നിയമസഭാ തെരഞ്ഞെടുപ്പിലുണ്ടായത് ജനാധിപത്യത്തിന്റെ വിജയമാണെന്ന് എൻഎസ്എസ് ജനറൽ സെക്രട്ടറി ജി സുകുമാരൻ നായർ. ഭരണകൂടത്തിന്റെ നടപടികളിൽ ജനങ്ങൾ പൊറുതിമുട്ടിയതിന്റെ പ്രതിഫലനമാണ് ഈ ഫലമെന്നും അദ്ദേഹം പെരുന്നയിൽ മാദ്ധ്യമങ്ങളോട് പ്രതികരിച്ചു. ചില നേതാക്കൾ ഈ വിജയം തങ്ങളുടെ വ്യക്തിപരമായ മിടുക്ക് കൊണ്ടാണെന്ന് അവകാശപ്പെടുന്നുണ്ടെങ്കിലും യഥാർത്ഥത്തിൽ ഒരു മാറ്റത്തിന് വേണ്ടി ജനങ്ങൾ നൽകിയ വോട്ടാണ് യുഡിഎഫിന് അനുകൂലമായി മാറിയതെന്ന് അദ്ദേഹം വ്യക്തമാക്കി.

മുഖ്യമന്ത്രി പദവിയെക്കുറിച്ചുള്ള ചർച്ചകളിൽ സംഘടനയ്ക്ക് പ്രത്യേക താൽപ്പര്യങ്ങളില്ലെന്ന് സുകുമാരൻ നായർ പറഞ്ഞു. കോൺഗ്രസ് ആരെ മുഖ്യമന്ത്രിയാക്കിയാലും എൻ.എസ്.എസിന് വിരോധമില്ലെന്നും എന്നാൽ കഴിവുള്ളവരും ഭരണപരിചയമുള്ളവരും ആ പദവിയിലേക്ക് വരണമെന്നാണ് ആഗ്രഹമെന്നും അദ്ദേഹം കൂട്ടിച്ചേർത്തു. മുഖ്യമന്ത്രിയെ തീരുമാനിക്കേണ്ടത് കോൺഗ്രസ് കേന്ദ്ര നേതൃത്വമാണെന്നും അത് അവരുടെ അധികാരപരിധിയിൽ വരുന്ന കാര്യമാണെന്നും അദ്ദേഹം ഓർമ്മിപ്പിച്ചു. വി.ഡി. സതീശൻ മുഖ്യമന്ത്രിയാകുന്നതിനെക്കുറിച്ചുള്ള ചോദ്യത്തിന്, അത് പാർട്ടിയുടെ തീരുമാനമാണെന്നും അത് സ്വീകരിച്ചല്ലേ പറ്റൂ എന്നുമായിരുന്നു അദ്ദേഹത്തിന്റെ മറുപടി. എന്നാൽ വി.ഡി. സതീശനോടുള്ള തന്റെ പഴയ വിയോജിപ്പുകൾ ഇപ്പോഴും നിലനിൽക്കുന്നുണ്ടെന്നും അത് തിരുത്താൻ താൻ ആരോടും ആവശ്യപ്പെടില്ലെന്നും അദ്ദേഹം വ്യക്തമാക്കി.

പുതിയ സർക്കാരിൽ നിന്ന് അനാവശ്യമായ സ്ഥാനമാനങ്ങളോ അനധികൃതമായ ആനുകൂല്യങ്ങളോ എൻ.എസ്.എസ് പ്രതീക്ഷിക്കുന്നില്ലെന്ന് ജനറൽ സെക്രട്ടറി പറഞ്ഞു. സമുദായത്തിന് അവകാശപ്പെട്ട കാര്യങ്ങൾ ചോദിക്കുമെന്നല്ലാതെ മറ്റൊന്നിലും താൽപ്പര്യമില്ല. നേരത്തെ പല കാര്യങ്ങളും കോടതിയിൽ പോയാണ് സംഘടന നേടിയെടുത്തത്. തിരഞ്ഞെടുപ്പിൽ എൻ.എസ്.എസ് കൃത്യമായ സമദൂര നിലപാടാണ് സ്വീകരിച്ചത്. പത്തനാപുരത്ത് കെ.ബി. ഗണേഷ് കുമാറിന്റെ പരാജയത്തെക്കുറിച്ചുള്ള ചോദ്യത്തിന്, അവിടെയും നായർ സമുദായത്തോട് സമദൂരത്തിൽ വോട്ട് ചെയ്യാനാണ് നിർദ്ദേശിച്ചതെന്നും ആരെയും ജയിപ്പിക്കാനോ തോൽപ്പിക്കാനോ സംഘടന പറഞ്ഞിട്ടില്ലെന്നും അദ്ദേഹം വിശദീകരിച്ചു. മന്ത്രിമാരുടെ കൂട്ടത്തോൽവി ജനവികാരത്തിന്റെ പ്രതിഫലനമാണെന്നും അദ്ദേഹം കൂട്ടിച്ചേർത്തു.