തെരഞ്ഞെടുപ്പിൽ തോറ്റിട്ടും അധികാരത്തിൽ കടിച്ചുതൂങ്ങുന്ന മമതയെ ചവിട്ടിപ്പുറത്താക്കണം!!രൂക്ഷവിമർശനവുമായി മുതിർന്ന അഭിഭാഷകൻ മഹേഷ് ജഠ്മലാനി

കൊൽക്കത്ത: ബംഗാൾ നിയമസഭാ തെരഞ്ഞെടുപ്പിലെ തോൽവിക്ക് പിന്നാലെ രാജിവെക്കാൻ വിസമ്മതിക്കുന്ന മുഖ്യമന്ത്രി മമത ബാനർജിയുടെ നിലപാടിനെതിരെ രൂക്ഷമായ ഭാഷയിൽ പ്രതികരിച്ച് മുതിർന്ന അഭിഭാഷകൻ മഹേഷ് ജഠ്മലാനി. മമതയുടെ ഈ പെരുമാറ്റം ഒട്ടും പൊറുക്കാനാവാത്തതാണെന്നും ജനാധിപത്യ സംവിധാനത്തോടുള്ള വെല്ലുവിളിയാണെന്നും അദ്ദേഹം അഭിപ്രായപ്പെട്ടു. തിരഞ്ഞെടുപ്പ് ഫലം കമ്മീഷൻ ഔദ്യോഗികമായി പ്രഖ്യാപിക്കുന്ന നിമിഷം മുതൽ മമത ബാനർജി മുഖ്യമന്ത്രിയല്ലാതായി മാറിയെന്നും നിലവിൽ അവർ മുഖ്യമന്ത്രിയുടെ ഓഫീസിലെ ഒരു അതിക്രമിച്ചു കയറിയ ആൾ മാത്രമാണെന്നും അദ്ദേഹം പറഞ്ഞു. മമത മാന്യമായി ഒഴിയാൻ തയ്യാറല്ലെങ്കിൽ ഗവർണർ അവരെ ഔദ്യോഗികമായി പിരിച്ചുവിടണമെന്നും ആവശ്യമെങ്കിൽ പോലീസിനെ ഉപയോഗിച്ച് ഒഴിപ്പിക്കണമെന്നും ജഠ്മലാനി ആവശ്യപ്പെട്ടു.

നൂറോളം സീറ്റുകൾ ബിജെപി മോഷ്ടിച്ചുവെന്ന മമതയുടെ ആരോപണത്തെയും ജഠ്മലാനി പരിഹസിച്ചു. അത്തരത്തിൽ തെളിവുണ്ടെങ്കിൽ കോടതിയിൽ ഇലക്ഷൻ പെറ്റീഷൻ ഫയൽ ചെയ്യുകയാണ് വേണ്ടതെന്നും ഭരണഘടനാ വിരുദ്ധമായി പെരുമാറുന്നത് ദീദിയെ പരിഹാസപാത്രമാക്കുമെന്നും അദ്ദേഹം ഓർമ്മിപ്പിച്ചു. ഭവാനിപൂരിലെ സ്വന്തം മണ്ഡലത്തിൽ പോലും പരാജയപ്പെട്ട മമതയുടെ വാശിക്കെതിരെ അസം മുഖ്യമന്ത്രി ഹിമന്ത ബിശ്വ ശർമയും രംഗത്തെത്തി. രാജ്യം മമതയുടെ ഇഷ്ടത്തിനനുസരിച്ചല്ല പോകുന്നതെന്നും ഗവർണർ നിശ്ചിത സമയം നൽകിയ ശേഷം അവരെ പദവിയിൽ നിന്ന് നീക്കം ചെയ്യുമെന്നും ശർമ വ്യക്തമാക്കി. ബംഗാളിലെ ജനങ്ങൾ ബിജെപിക്ക് വ്യക്തമായ ജനവിധി നൽകിയിട്ടും അത് അംഗീകരിക്കാത്തത് ജനാധിപത്യത്തോടുള്ള അവഹേളനമാണെന്ന വികാരമാണ് ദേശീയ തലത്തിൽ ഉയരുന്നത്.