കനത്ത മഴയെ അവഗണിച്ചും ശബരിമലയിലേക്ക് തീര്‍ത്ഥാടക പ്രവാഹം; തൃക്കാര്‍ത്തിക ദിവസം ദര്‍ശനം നടത്തിയത് 78483 പേർ !

പത്തനംതിട്ട: ശബരിമലയിൽ തുടർച്ചയായ മൂന്നാം ദിവസവും വൻ ഭക്തജന തിരക്ക്. കഴിഞ്ഞ ദിവസം തീർത്ഥാടകരുടെ എണ്ണം 75,000 പിന്നിട്ടിരുന്നു. കനത്ത മഴയെ അവഗണിച്ചും പതിനായിരക്കണക്കിന് തീർത്ഥാടകരാണ് സന്നിധാനത്തേക്ക് പ്രവഹിക്കുന്നത്. വൃശ്ചികത്തിലെ തൃക്കാർത്തിക ദിവസമായ ഇന്നലെ 78,483 തീർത്ഥാടകരാണ് ദർശനം നടത്തിയത്.

അതേസമയം, കാലാവസ്ഥ പ്രതികൂലമായി തുടരുന്ന സാഹചര്യത്തിൽ തീർത്ഥാടകരുടെ സുരക്ഷ ഏകോപിപ്പിക്കാൻ സംയുക്ത തല യോഗം ചേർന്നു. നിലവിൽ തീർത്ഥാടകർക്ക് യാതൊരു നിയന്ത്രണങ്ങളും ഏർപ്പെടുത്തിയിട്ടില്ല. വനമേഖലയിൽ വഴുക്കൽ ഉള്ളതിനാൽ കാനന പാത വഴി വരുന്ന ഭക്തർ അതീവ ജാഗ്രത പുലർത്തണം എന്ന നിർദ്ദേശം അധികൃതർ നൽകിയിട്ടുണ്ട്.