ക്രിയാത്മക നിർദ്ദേശങ്ങൾക്കായി പാർലമെന്റിൽ പ്രതിപക്ഷ ശബ്ദം ഉയരണം; മാന്യതയില്ലാത്ത പെരുമാറ്റം അനുവദിക്കില്ല; നാളെ ഇടക്കാല ബഡ്‌ജറ്റ്‌; സമ്പൂർണ്ണ ബഡ്‌ജറ്റുമായി തെരഞ്ഞെടുപ്പിന് ശേഷം കാണാം; ആത്മവിശ്വാസത്തോടെ പ്രധാനമന്ത്രി നരേന്ദ്രമോദി

ദില്ലി: നാരീശക്തി വിളിച്ചോതുന്നതാകും നാളെ അവതരിപ്പിക്കാൻ പോകുന്ന കേന്ദ്ര ബഡ്‌ജറ്റെന്ന് പ്രധാനമന്ത്രി നരേന്ദ്രമോദി. പാർലമെന്റിന്റെ ബഡ്‌ജറ്റ്‌ സമ്മേളനം ഇന്ന് ആരംഭിച്ചിരുന്നു. ഇതിന് മുന്നോടിയായായി മാദ്ധ്യമങ്ങളോട് സംസാരിക്കുകയായിരുന്നു പ്രധാനമന്ത്രി നരേന്ദ്രമോദി. നാളെ ഇടക്കാല ബഡ്‌ജറ്റാകും ധനമന്ത്രി നിർമ്മല സീതാരാമൻ അവതരിപ്പിക്കുകയെന്നും സമ്പൂർണ്ണ ബഡ്ജറ്റുമായി തെരഞ്ഞെടുപ്പിന് ശേഷം കാണാമെന്നും പ്രധാനമന്ത്രി ആത്മവിശ്വാസം പ്രകാശിപ്പിച്ചു. വനിതാ സംവരണ ബിൽ പാസാക്കിയത് ചരിത്ര നേട്ടമാണ്. ക്രിയാത്മക നിർദ്ദേശങ്ങൾക്കായി പാർലമെന്റിൽ പ്രതിപക്ഷ സ്വരം ഉയരണമെന്നും മാന്യതയില്ലാത്ത പെരുമാറ്റം സഭയിൽ അനുവദിക്കില്ലെന്നും അദ്ദേഹം കൂട്ടിച്ചേർത്തു.

കഴിഞ്ഞ പാർലമെന്റ് സമ്മേളനത്തിൽ പാർലമെന്റിൽ ചിലർ അതിക്രമിച്ച് കയറിയ സംഭവം ഉയർത്തിക്കാട്ടി. പ്രതിപക്ഷം സഭ തടസ്സപ്പെടുത്തിയിരുന്നു. തുടർന്ന് നിരവധി എം പി മാരെ ഇരു സഭകളിൽ നിന്നും സസ്‌പെന്റ് ചെയ്‌തിരുന്നു. അതിൽ ചിലരുടെ സസ്‌പെൻഷൻ ഖേദം പ്രകടിപ്പിച്ചതിനെ തുടർന്ന് പിൻവലിച്ചിരുന്നു.