പ്രധാനമന്ത്രി നരേന്ദ്രമോദി ഇന്ന് പഞ്ചാബിൽ; കനത്ത സുരക്ഷയിൽ സംസ്ഥാനം

ദില്ലി: തെരഞ്ഞെടുപ്പ് പ്രചാരണത്തോടനുബന്ധിച്ച് പ്രധാനമന്ത്രി നരേന്ദ്ര മോദി ഇന്ന് (Modi In Punjab)പഞ്ചാബിലെത്തും. വിവാദമായ സുരക്ഷാ വീഴ്ചയ്ക്ക് ശേഷം ഇതാദ്യമായാണ് പ്രധാനമന്ത്രിയുടെ പഞ്ചാബ് സന്ദർശനം. ഇന്ന് ജലന്ധറിലും ഫെബ്രുവരി 16ന് പത്താൻകോട്ടിലും ഫെബ്രുവരി 17ന് അബോഹറിലുമാണ് പ്രധാനമന്ത്രി എത്തുന്നത്.

അതേസമയം മോദിക്കെതിരെ പ്രതിഷേധിക്കുമെന്ന് സംയുക്ത കിസാൻ മോർച്ച(എസ്കെഎം)യുടെ കീഴിലുള്ള 23 കർഷക സംഘടനകൾ പ്രഖ്യാപിച്ചു. ഈ സാഹചര്യത്തിൽ സംസ്ഥാനത്ത് സുരക്ഷ കൂടുതൽ ശക്തമാക്കിയിരിക്കുകയാണ്. അതേസമയം ജനുവരി 5ന് പഞ്ചാബിലെത്തിയ പ്രധാനമന്ത്രിയുടെ വാഹനവ്യൂഹം പഞ്ചാബിലെ ഫിറോസ്പുരിൽ കർഷകർ തടഞ്ഞതു വലിയ കോളിളക്കമുണ്ടാക്കിയിരുന്നു.

റോഡ് ഉപരോധത്തെത്തുടർന്ന് 20 മിനിറ്റോളം മേൽപാലത്തിൽ കുടുങ്ങിയ പ്രധാനമന്ത്രി റാലി റദ്ദാക്കി ദില്ലിയിലേക്ക് മടങ്ങിയിരുന്നു. സംഭവത്തിൽ കനത്ത ആക്ഷേപമാണ് പഞ്ചാബ് സർക്കാരിനെതിരെ ഉയർന്നത്. രാഷ്ട്രീയഭേദമന്യേ പല പ്രമുഖ നേതാക്കളും വിഷയത്തിൽ ശക്തമായ പ്രതിഷേധം രേഖപ്പെടുത്തിയിരുന്നു.