ലഖ്നൗവിലെ ലുലുവിൽ നിസ്‌കരിച്ച നാല് യുവാക്കളെ കസ്റ്റഡിയിലെടുത്ത് പോലീസ് ചോദ്യം ചെയ്യൽ ആരംഭിച്ചു;അഞ്ച് പേർക്കായുള്ള തിരച്ചിൽ തുടരുന്നു

ലഖ്നൗവിലെ ലുലു മാളിനുള്ളിൽ പ്രാർത്ഥന നടത്തിയ യുവാക്കളെ തിരിച്ചറിഞ്ഞു. ലുലുവിൽ നിസ്‌കരിച്ച നാല് യുവാക്കളെ കസ്റ്റഡിയിലെടുത്ത് പോലീസ് ചോദ്യം ചെയ്യൽ ആരംഭിച്ചു. പിടിക്കപ്പെട്ട നാല് യുവാക്കളും മുസ്ലീങ്ങളാണെന്നും ഇവർ സംഘമായി ചേർന്ന് ലുലുവിൽ നിസ്‌കരിക്കുകയായിരുന്നുവെന്നും പോലീസ് പറഞ്ഞു. ഇവരുടെ പേര് വിവരങ്ങൾ പോലീസ് പുറത്തുവിട്ടിട്ടില്ല. ലുലുവിന്റെ ഉദ്ഘാടനം കഴിഞ്ഞ് രണ്ട് പിന്നിട്ടപ്പോഴാണ് നിസ്‌കരിക്കുന്ന വീഡിയോ പുറത്തുവന്നത്.

ഒൻപത് പേരാണ് ലുലുവിൽ നിസ്‌കരിച്ചത്. അതിൽ നാല് പേരെ പോലീസ് തിരിച്ചറിഞ്ഞു. അഞ്ച് പേർക്കായുള്ള തിരച്ചിൽ തുടരുകയാണ്. അതേസമയം നിസ്‌കാര വീഡിയോ പുറത്തുവന്നതിന് പിന്നാലെ ലുലുവിൽ വലിയ പ്രതിഷേധവുമായി ഹിന്ദു സംഘടനകളും എത്തിയിരുന്നു. സംഭവത്തിൽ കഴിഞ്ഞ ആഴ്ച്ച അറസ്റ്റിലായ നാല് പേരെ കുറിച്ചും പോലീസ് വ്യക്തത വരുത്തി. നേരത്തെ അറസ്റ്റിലായവരും മുസ്ലീങ്ങളാണെന്നായിരുന്നു പ്രചരിച്ചത്. എന്നാൽ ഈ പ്രചാരണം പോലീസ് തള്ളി.

സരോജ് നാഥ് യോഗി, കൃഷ്ണ കുമാർ പതക്, ഗൗരവ് ഗോസ്വാമി, അർഷാദ് അലി എന്നീ നാല് പേരെയാണ് ജൂലൈ 15ന് കസ്റ്റഡിയിലെടുത്തതെന്ന് പോലീസ് പറഞ്ഞു. ലുലുവിനുള്ളിൽ മതപരമായ ആചാരങ്ങൾ നടത്തിയതിനാണ് ഇവരെ അറസ്റ്റ് ചെയ്തിരിക്കുന്നത്. യോഗി, പഥക്, ഗോസ്വാമി എന്നിവർ പൂജ നടത്താൻ ശ്രമിക്കുമ്പോൾ അലി മാളിന്റെ പരിസരത്ത് നമസ്‌കരിക്കാൻ ശ്രമിക്കുകയായിരുന്നു.

ജൂലൈ 15 ന് അറസ്റ്റിലായ നാല് പേരിൽ മൂന്ന് പേരും ജൂലൈ 12 ന് നടന്ന സംഭവത്തിലെ നിസ്‌കരിച്ചവരാണെന്ന തരത്തിൽ തെറ്റിദ്ധരിപ്പിക്കുന്ന വാർത്തകൾ സോഷ്യൽ മീഡിയയിൽ പ്രചരിച്ചിരുന്നുവെന്നും പോലീസ് പുറത്തിറക്കിയ കുറിപ്പിൽ പറയുന്നു. ഈ നാലുപേരെക്കൂടാതെ ക്രമസമാധാനം തകർത്തതിന് 18 പേർക്കെതിരെ കേസെടുത്തിട്ടുണ്ട്. ഹനുമാൻ ചാലിസ ചൊല്ലിയതിനും പ്രതിഷേധ പ്രകടനത്തിൽ ഏർപ്പെട്ടതിനും രണ്ടുപേരെ കസ്റ്റഡിയിലെടുക്കുകയും ചെയ്തിട്ടുണ്ട്.

കുറ്റവാളികൾക്കെതിരെ കർശന നടപടി സ്വീകരിക്കണമെന്ന് മുഖ്യമന്ത്രി യോഗി ആദിത്യനാഥ് പോലീസിന് നിർദ്ദേശം നൽകി. സുരക്ഷാ വീഴ്ച്ചകൾ വെച്ചുപൊറിപ്പിക്കില്ലെന്നും കുറ്റവാളികളെ കർശനമായി നേരിടുമെന്നും യോഗി ആദിത്യനാഥ് പറഞ്ഞു. പ്രാർത്ഥനയോ മറ്റ് പരിപാടികളോ സംഘടിപ്പിച്ച് റോഡിൽ ഗതാഗതം തടസ്സപ്പെടുത്താൻ പാടില്ലെന്നും യോഗി ആദിത്യനാഥ് അറിയിച്ചു.