പോലീസ് ബൈക്ക് തടഞ്ഞത് ഇഷ്ടമായില്ല; നടുറോഡിലിട്ട് സ്വന്തം വാഹനം പെട്രോൾ ഒഴിച്ച് കത്തിച്ച് യുവാവ്

ഹൈദരാബാദ്:തെറ്റായ ദിശയിൽ വന്ന ബൈക്കിനെ പോലീസ് തടഞ്ഞത് ഇഷ്ടമായില്ല,സ്വന്തം ബൈക്ക് പെട്രോൾ ഒഴിച്ച് കത്തിച്ച് യുവാവ്. ഹൈദരാബാദിലെ മൈത്രിവനം ജംഗ്ഷനിലാണ് സംഭവം നടന്നത്.
നിയമം തെറ്റിക്കുകയും വഴിയിൽ ട്രാഫിക് ബ്ലോക്ക് സൃഷ്ടിക്കുന്ന തരത്തിൽ ബൈക്ക് ഓടിച്ചതോടെയുമാണ് പോലീസ് യുവാവിനെ തടഞ്ഞത്.എന്നാൽ പോലീസ് തന്റെ ബൈക്ക് തടഞ്ഞത് ഇഷ്ടപ്പെടാത്ത അശോക് ആദിത്യ കടയിൽ നിന്നും പെട്രോളുമായി തിരികെ എത്തി വാഹനം നടുറോഡിലിട്ട് കത്തിക്കുകയായിരുന്നു. ഇതിന്റെ ദൃശ്യം സമൂഹമാദ്ധ്യമങ്ങളിൽ പ്രചരിക്കുകയാണ്.

ബൈക്കിൽ പെട്രോൾ ഒഴിച്ച് തീ കത്തിച്ച ശേഷം അശോക് സ്ഥലത്തു നിന്നും മാറി നിന്നു. ഇതോടെ തീ അണയ്‌ക്കാൻ ട്രാഫിക് പോലുസുകാരൻ ശ്രമിക്കുന്ന വീഡിയോ സമൂഹമാദ്ധ്യമങ്ങളിൽ വൈറലാകുകയാണ്. അമീർപേട്ടിൽ മൊബൈൽ ഷോപ്പ് നടത്തുകയാണ് അശോക് ആദിത്യ.

യാത്രക്കാരുടെ സുരക്ഷയ്‌ക്കായി ഹൈദരാബാദ് ട്രാഫിക് പോലീസ് ട്രാഫിക് നിയമങ്ങൾ നടപ്പിലാക്കുകയും നിയമങ്ങൾ പാലിക്കാതെയും അപകടകരമായ രീതിയിൽ വാഹനങ്ങൾ ഓടിക്കുകയും ചെയ്യുന്ന യാത്രക്കാർക്കെതിരെ കർശനമായി നടപടിയെടുക്കുന്നുണ്ടെന്നും പോലീസ് വ്യക്തമാക്കി.