ഛത്തീസ്ഗഢിൽ വൻ ഏറ്റുമുട്ടൽ ! 12 കമ്മ്യൂണിസ്റ്റ് ഭീകരരെ വധിച്ച് സുരക്ഷാസേന; മുതിർന്ന കമാൻഡർ ഉൾപ്പെടെ 20 പേർ കീഴടങ്ങി

സുക്മ : ഛത്തീസ്ഗഢിലെ സുക്മയിലുണ്ടായ ശക്തമായ ഏറ്റുമുട്ടലിൽ അഞ്ച് സ്ത്രീകൾ ഉൾപ്പെടെ 12 കമ്മ്യൂണിസ്റ്റ് ഭീകരരെ വധിച്ച് സുരക്ഷാസേന . നിലം തുമൽപാഡ് വനമേഖലയിൽ നടന്ന തിരച്ചിലിനിടെയാണ് സുരക്ഷാസേനയും ഭീകരരും തമ്മിൽ വെടിവെപ്പുണ്ടായത്. കൊല്ലപ്പെട്ടവരിൽ കോട്ട-കിസ്‌താരം ഏരിയ കമ്മിറ്റിയിലെ മുതിർന്ന നേതാക്കളും ഉൾപ്പെടുന്നു. ഇവരുടെ തലയ്ക്ക് 60 ലക്ഷം രൂപയോളം പാരിതോഷികം പ്രഖ്യാപിച്ചിരുന്നതായി അധികൃതർ വെളിപ്പെടുത്തി. സംഭവസ്ഥലത്തുനിന്ന് എകെ-47, ഇൻസാസ് റൈഫിളുകൾ, എസ്എൽആറുകൾ എന്നിവയടക്കം വൻ ആയുധശേഖരവും വെടിക്കോപ്പുകളും കണ്ടെടുത്തിട്ടുണ്ട്. കഴിഞ്ഞ ജൂണിൽ അഡീഷണൽ എസ്പി ആകാൻക്ഷ യാദവ് ഗിരിപുഞ്ജെയുടെ വീരമൃത്യുവിന് കാരണമായ ബസ് സ്ഫോടനത്തിന് പിന്നിൽ പ്രവർത്തിച്ചവരാണ് കൊല്ലപ്പെട്ട മാവോയിസ്റ്റുകളെന്ന് പോലീസ് സ്ഥിരീകരിച്ചു.

ഇതിനിടെ കമ്മ്യൂണിസ്റ്റ് ഭീകരർക്ക് വൻ തിരിച്ചടി നൽകിക്കൊണ്ട് പിഎൽജിഎ ബറ്റാലിയൻ കമാൻഡർ ബാഡ്‌സെ സുക്ക എന്ന ദേവയും 19 അനുയായികളും തെലങ്കാന പോലീസിന് മുന്നിൽ കീഴടങ്ങി. മാഡ്വി ഹിഡ്മയുടെ പകരക്കാരനായി അറിയപ്പെട്ടിരുന്ന നേതാവാണ് ദേവ. കീഴടങ്ങലിനൊപ്പം മാവോയിസ്റ്റുകൾ ഒളിപ്പിച്ചുവെച്ചിരുന്ന വലിയ ആയുധശേഖരത്തെക്കുറിച്ചുള്ള വിവരങ്ങളും ഇവർ കൈമാറി. എൽഎംജികൾ, യുഎസ് നിർമ്മിത കോൾട്ട് റൈഫിളുകൾ, ഇസ്രായേൽ നിർമ്മിത ടാവർ റൈഫിളുകൾ എന്നിവയുൾപ്പെടെ 48 അത്യാധുനിക ആയുധങ്ങളും രണ്ടായിരത്തിലധികം തിരകളും ഇവർ പോലീസിന് കൈമാറിയിട്ടുണ്ട്. സർക്കാരിന്റെ അന്ത്യശാസനത്തിന് മുൻപുള്ള ഈ കീഴടങ്ങൽ കമ്മ്യൂണിസ്റ്റ് ഭീകരരുടെ സമ്പൂർണ്ണ തകർച്ചയെയാണ് സൂചിപ്പിക്കുന്നതെന്ന് പോലീസ് ഉദ്യോഗസ്ഥർ അവകാശപ്പെടുന്നു.

ഈ വർഷത്തെ ആദ്യ ഏറ്റുമുട്ടലുകളിൽ സുക്മയിലും ബീജാപ്പൂരിലുമായി ഇതിനോടകം 14 കമ്മ്യൂണിസ്റ്റ് ഭീകരരെ സുരക്ഷാസേന വധിച്ചിട്ടുണ്ട്. ബീജാപ്പൂരിലെ വനമേഖലയിൽ നടന്ന ഓപ്പറേഷനിൽ രണ്ട് പേരും സുക്മയിൽ നടന്ന മറ്റൊരു ഏറ്റുമുട്ടലിൽ 12 പേരുമാണ് കൊല്ലപ്പെട്ടത്. കോണ്ട ഏരിയ കമ്മിറ്റി സെക്രട്ടറിയും മുതിർന്ന നേതാവുമായ മംഗ്ഡു ഉൾപ്പെടെയുള്ളവർ കൊല്ലപ്പെട്ടവരിൽ ഉൾപ്പെടുന്നു. ദക്ഷിണ ബസ്തർ മേഖലയിൽ ഭീകര സാന്നിധ്യമുണ്ടെന്ന രഹസ്യവിവരത്തെത്തുടർന്ന് ഡിസ്ട്രിക്റ്റ് റിസർവ് ഗാർഡ് (DRG) നടത്തിയ തിരച്ചിലാണ് നിർണ്ണായക വിജയത്തിൽ കലാശിച്ചത്. നിലവിൽ മേഖലയിൽ സുരക്ഷാസേന തിരച്ചിൽ ഊർജ്ജിതമാക്കിയിരിക്കുകയാണ്.