സ്ഥാനമാനങ്ങൾ മുഖ്യം !! ഡിഎംകെയിൽ നിന്ന് മറുകണ്ടം ചാടി കോൺഗ്രസ് !! ടിവികെയ്ക്ക് പിന്തുണ നൽകും; മന്ത്രിസ്ഥാനം അടക്കം ആവശ്യപ്പെട്ടേക്കും

ചെന്നൈ: തമിഴ്‌നാട് നിയമസഭാ തിരഞ്ഞെടുപ്പിൽ വൻ മുന്നേറ്റം നടത്തിയ നടൻ വിജയ്‌യുടെ തമിഴക വെട്രി കഴകത്തിന് (ടിവികെ) പിന്തുണ പ്രഖ്യാപിച്ച് കോൺഗ്രസ് . കോൺഗ്രസ് നിയമസഭാ കക്ഷിയും തമിഴ്‌നാട് പി.സി.സിയും എടുത്ത ഈ തീരുമാനം സഖ്യ കക്ഷിയായിരുന്ന ഡിഎംകെയും തള്ളി സംസ്ഥാനത്ത് പുതിയൊരു രാഷ്ട്രീയ അദ്ധ്യായത്തിനാണ് വഴിതുറന്നിരിക്കുന്നത്.

നിലവിൽ 107 സീറ്റുകളുള്ള ടി.വി.കെക്ക് കോൺഗ്രസിന്റെ അഞ്ച് എം.എൽ.എമാരുടെ പിന്തുണ കൂടി ലഭിക്കുന്നതോടെ അംഗസംഖ്യ 112 ആയി ഉയരും. കേവല ഭൂരിപക്ഷത്തിന് 118 സീറ്റുകൾ വേണ്ട സാഹചര്യത്തിൽ ആറ് അംഗങ്ങളുടെ പിന്തുണ കൂടി വിജയ്‍ക്ക് ആവശ്യമാണ്. ഇതിനായി വി.സി.കെ, സി.പി.ഐ, സി.പി.എം തുടങ്ങിയ പാർട്ടികളുമായി വിജയ് ചർച്ചകൾ ആരംഭിച്ചു കഴിഞ്ഞു. ഈ പാർട്ടികൾ കൂടി പിന്തുണ നൽകുകയാണെങ്കിൽ സഖ്യത്തിന് 119 സീറ്റുകളുടെ പിന്തുണയോടെ സുരക്ഷിതമായി സർക്കാർ രൂപീകരിക്കാൻ സാധിക്കും. ലോക്‌സഭാ, രാജ്യസഭാ തിരഞ്ഞെടുപ്പുകളിലും തദ്ദേശ സ്വയംഭരണ തിരഞ്ഞെടുപ്പുകളിലും ഈ സഖ്യം തുടരുമെന്നാണ് കോൺഗ്രസ് വ്യക്തമാക്കുന്നത്. മതേതരവും പുരോഗമനപരവുമായ ഒരു ഭരണം കാഴ്ചവെക്കുമെന്ന് വിജയ്‌യും രാഹുൽ ഗാന്ധിയും സംയുക്തമായി ഉറപ്പുനൽകി.

ആറ് പതിറ്റാണ്ടിലേറെയായി തമിഴ്‌നാട് രാഷ്ട്രീയം അടക്കിവാണിരുന്ന ദ്രാവിഡ കക്ഷികളുടെ ആധിപത്യം തകർത്തുകൊണ്ടാണ് വിജയ്‌യുടെ ടി.വി.കെ ഏറ്റവും വലിയ ഒറ്റക്കക്ഷിയായത്. ഡി.എം.കെ 59 സീറ്റുകളിലേക്കും എ.ഐ.എ.ഡി.എം.കെ 47 സീറ്റുകളിലേക്കും ചുരുങ്ങി. മത്സരിച്ച തൃശ്ശിനാപ്പള്ളി ഈസ്റ്റ്, പെരമ്പൂർ മണ്ഡലങ്ങളിൽ വിജയ് ഉജ്ജ്വല വിജയം നേടിയിരുന്നു. ഇതിൽ പെരമ്പൂർ നിലനിർത്തി തൃശ്ശിനാപ്പള്ളി ഈസ്റ്റ് അദ്ദേഹം ഒഴിഞ്ഞേക്കുമെന്നാണ് സൂചന