പ്രതിഷേധത്തിന് പിന്നാലെ സ്ഥാനം; ചാണ്ടി ഉമ്മന് എഐസിസി പദവി നൽകി ഒത്തുതീർപ്പിന് ഹൈക്കമാൻഡിന്റെ ശ്രമം ! ടാലന്റ് ഹണ്ട് കോർഡിനേറ്റർ സ്ഥാനത്തിന് പുറമെ മേഘാലയുടെയും അരുണാചലിന്റെയും ചുമതല

ദില്ലി : കെപിസിസി പുനഃസംഘടനയിലെ വിവാദങ്ങൾക്കും പ്രതിഷേധനകൾക്കുമിടയിൽ ചാണ്ടി ഉമ്മന് എഐസിസി പദവി നൽകി ഒത്തുതീർപ്പ് ശ്രമവുമായി കോൺഗ്രസ് ഹൈക്കമാൻഡ്. ടാലന്റ് ഹണ്ട് കോർഡിനേറ്റർ സ്ഥാനത്തിന് പുറമെ മേഘാലയുടെയും അരുണാചലിന്റെയും ചുമതലയുമാണ് ചാണ്ടി ഉമ്മന് നൽകിയിരിക്കുന്നതെന്ന് എഐസിസി മീഡിയ വിഭാഗം തലവൻ പവൻ ഖേര വ്യക്തമാക്കി.

യൂത്ത് കോൺഗ്രസ് നാഷണൽ ഔട്ട് റീച്ച് സെൽ ചെയർമാൻ പദവിയിൽനിന്ന് അപ്രതീക്ഷിതമായി തന്നെ പുറത്താക്കിയതിൽ ചാണ്ടി ഉമ്മൻ പരസ്യമായ അതൃപ്തി പ്രകടിപ്പിച്ചിരുന്നു. വിഷയം രാഷ്ട്രീയ ചർച്ചകൾക്ക് വഴിതുറന്നതോടെയാണ് പുതിയ നീക്കമെന്നാണ് വിലയിരുത്തൽ. അതേസമയം വനിതാ നേതാവ് ഷമാ മുഹമ്മദിന് ഗോവയുടെ ചുമതലയും നൽകി. പുനഃസംഘടനയിൽ അതൃപ്തി പരസ്യമാക്കി ആദ്യം രംഗത്തെത്തിയത് ഷമ മുഹമ്മദായിരുന്നു. പട്ടികയ്ക്ക് പിന്നാലെ കഴിവ് മാനദണ്ഡമോയെന്ന പരിഹാസ പോസ്റ്റുമായാണ് ഷമ മുഹമ്മദ് രംഗത്തെത്തിയത്. പുനഃസംഘടനയിൽ പരിഗണിക്കണമെന്ന് നേതൃത്വത്തോട് ഷമ നേരത്തെ തന്നെ ആവശ്യപ്പെട്ടിരുന്നു. ഡിസിസിയുടെ പരിപാടികളിലും സമരങ്ങളിലും ഷമ അടുത്തിടെ സജീവമായിരുന്നു. എന്നിട്ടും പുനഃസംഘടനയിൽ ഇടം ലഭിക്കാത്തതാണ് ഷമയെ പ്രകോപിച്ചത്.