നവരാത്രിയോടനുബന്ധിച്ച് ചെറുകിട സമ്പാദ്യ പദ്ധതികളില്‍ നിക്ഷേപം നടത്തുന്നവര്‍ക്ക് വന്‍ സമ്മാനവുമായി കേന്ദ്ര സര്‍ക്കാര്‍ ; പോസ്റ്റ് ഓഫീസിലെ സ്‌കീമുകളുടെ പുതിയ പലിശ നിരക്കുകള്‍ സര്‍ക്കാര്‍ പുറത്തിറക്കി.

ദില്ലി ; ചെറുകിട സമ്പാദ്യ പദ്ധതികളില്‍ നിക്ഷേപം നടത്തുന്നവര്‍ക്ക് വന്‍ സമ്മാനവുമായി കേന്ദ്ര സര്‍ക്കാര്‍ രംഗത്ത് .പുതുക്കിയ പലിശ നിരക്കുകൾ പുറത്തിറക്കി . ഒരു സ്‌കീമിന്റെ മെച്യൂരിറ്റി കാലയളവിലും മാറ്റമുണ്ട് . റിസര്‍വ് ബാങ്ക് ഓഫ് ഇന്ത്യ (ആര്‍ബിഐ) തുടര്‍ച്ചയായി റിപ്പോ നിരക്ക് ഉയര്‍ത്തുകയാണ്. ഇത് കണക്കിലെടുത്താണ് ചെറുകിട സമ്പാദ്യ പദ്ധതിയില്‍ നിക്ഷേപിക്കുന്ന തുകയുടെ പലിശ സര്‍ക്കാര്‍ വര്‍ദ്ധിപ്പിച്ചത്. 27 മാസത്തിന് ശേഷമാണ് ചെറുകിട സമ്പാദ്യ പദ്ധതികളുടെ പലിശ നിരക്ക് സര്‍ക്കാര്‍ വര്‍ദ്ധിപ്പിച്ചിരിക്കുന്നത്.

പുതിയ നിരക്ക് അനുസരിച്ച്, മൂന്ന് വര്‍ഷത്തേക്ക് പോസ്റ്റ് ഓഫീസില്‍ നിക്ഷേപിക്കുന്ന തുകയ്ക്ക് 5.8 ശതമാനം പലിശ ലഭിക്കും. നേരത്തെ ഇത് 5.5 ശതമാനമായിരുന്നു. രണ്ട് വര്‍ഷത്തെ നിക്ഷേപങ്ങളുടെ പലിശ നിരക്ക് 5.5 ശതമാനത്തില്‍ നിന്ന് 5.7 ശതമാനമാക്കി. അതേ സമയം, സീനിയര്‍ സിറ്റിസണ്‍ സേവിംഗ് സ്‌കീമിന് (എസ്സിഎസ്എസ്) ഇപ്പോള്‍ 7.6 ശതമാനം പലിശ ലഭിക്കും. ഇതുവരെ, ഈ പദ്ധതിയില്‍ നിക്ഷേപകര്‍ക്ക് 7.4 ശതമാനം പലിശ ലഭിച്ചിരുന്നു.

പോസ്റ്റ് ഓഫീസിന്റെ ജനപ്രിയ പദ്ധതിയായ കിസാന്‍ വികാസ് പത്രയില്‍ നിക്ഷേപിക്കുന്നവര്‍ക്ക് രണ്ട് മാറ്റങ്ങളുണ്ട്. ഈ സ്‌കീമില്‍ ലഭ്യമായ പലിശ നിരക്ക് വര്‍ദ്ധിപ്പിച്ചതോടെ, കിസാന്‍ വികാസ് പത്രയുടെ മെച്യൂരിറ്റി കാലയളവ് കുറച്ചു. കിസാന്‍ വികാസ് പത്ര സ്‌കീമില്‍ നിക്ഷേപിക്കുന്നവര്‍ക്ക് ഇപ്പോള്‍ നിക്ഷേപങ്ങള്‍ക്ക് 7.0 ശതമാനം പലിശ ലഭിക്കും. അതേ സമയം, ഈ സ്‌കീം ഇപ്പോള്‍ 124 മാസത്തിന് പകരം 123 മാസത്തിനുള്ളില്‍ കാലാവധി പൂര്‍ത്തിയാകും. പ്രതിമാസ വരുമാന അക്കൗണ്ട് സ്‌കീമിന്റെ പലിശ നിരക്ക് 6.6% ല്‍ നിന്ന് 6.7% ആയി ഉയര്‍ത്തി.

2022-23 സാമ്പത്തിക വര്‍ഷത്തിൽ ഈ സേവിംഗ്‌സ് സ്‌കീമുകളുടെ പലിശ നിരക്കില്‍ മാറ്റം വരുത്തിയതായി ധനമന്ത്രാലയത്തിന്റെ പ്രസ്താവനയില്‍ പറയുന്നു. മൂന്ന് മാസത്തിലൊരിക്കല്‍ സേവിംഗ്‌സ് സ്‌കീമുകളുടെ പലിശ നിരക്ക് സര്‍ക്കാര്‍ അവലോകനം ചെയ്യും. 27 മാസത്തിന് ശേഷമാണ് ഈ പദ്ധതികളുടെ പലിശ നിരക്ക് വര്‍ദ്ധിപ്പിച്ചിരിക്കുന്നത്.

എന്നിരുന്നാലും, പബ്ലിക് പ്രൊവിഡന്റ് ഫണ്ട് (പിപിഎഫ്), നാഷണല്‍ സേവിംഗ്‌സ് സര്‍ട്ടിഫിക്കറ്റ്, സുകന്യ സമൃദ്ധി യോജന എന്നിവയുടെ പലിശയില്‍ സര്‍ക്കാര്‍ മാറ്റമൊന്നും വരുത്തിയിട്ടില്ല. റിസര്‍വ് ബാങ്ക് തുടര്‍ച്ചയായി വര്‍ദ്ധിപ്പിക്കുന്ന റിപ്പോ നിരക്ക് കാരണം, സര്‍ക്കാര്‍ സേവിംഗ്‌സ് സ്‌കീമുകളുടെ പലിശ വര്‍ദ്ധിപ്പിച്ചു. റിസര്‍വ് ബാങ്കിന് വീണ്ടും റിപ്പോ നിരക്ക് ഉയര്‍ത്താന്‍ കഴിയുമെന്നാണ് പ്രതീക്ഷിക്കുന്നത്.