ഏഴ് വർഷത്തിന് ശേഷം ഇൻസ്റ്റഗ്രാം ഡിപി മാറ്റി പ്രഭാസ്; ഇനി ‘ഫൗസി’ ലുക്ക്

തെലുങ്ക് സൂപ്പർ താരം പ്രഭാസ് ഏഴ് വർഷത്തിന് ശേഷം തന്റെ ഇൻസ്റ്റഗ്രാം പ്രൊഫൈൽ ചിത്രം മാറ്റി. ‘ബാഹുബലി’യിലെ കഥാപാത്രത്തിന്റെ ചിത്രമായിരുന്നു ഇത്രയും കാലം പ്രഭാസിന്റെ ഇൻസ്റ്റഗ്രാം ഡിപിയായി ഉണ്ടായിരുന്നത്. ഇപ്പോഴിതാ, പുതിയ ചിത്രം ‘ഫൗസി’യിലെ തന്റെ കഥാപാത്രത്തിന്റെ ചിത്രം പ്രൊഫൈൽ പിക്ചറായി താരം മാറ്റിയിരിക്കുകയാണ്.

പ്രഭാസ് ഡിപി മാറ്റിയ വിവരം ചിത്രത്തിന്റെ അണിയറപ്രവർത്തകർ തന്നെ പ്രധാന അപ്ഡേറ്റായാണ് അവതരിപ്പിച്ചത്. ‘ഫൗസി’യുമായി ബന്ധപ്പെട്ട വലിയ പ്രതീക്ഷയാണ് ഈ മാറ്റത്തിന് പിന്നിലെന്നാണ് ആരാധകരുടെ വിലയിരുത്തൽ.

ഹനു രാഘവപുടി സംവിധാനം ചെയ്യുന്ന ‘ഫൗസി’ 2026 ഡിസംബർ മൂന്നിന് ആഗോള റിലീസിനൊരുങ്ങുകയാണ്. മൈത്രി മൂവി മേക്കേഴ്‌സിന്റെ ബാനറിൽ നവീൻ യെർനേനിയും വൈ രവിശങ്കറും ചേർന്നാണ് ചിത്രം നിർമിക്കുന്നത്. ടി-സീരീസ് ഫിലിംസിന്റെ ബാനറിൽ ഗുൽഷൻ കുമാറും ഭൂഷൺ കുമാറും ചിത്രം അവതരിപ്പിക്കുന്നു. ‘എ ബറ്റാലിയൻ ഹു ഫൈറ്റ്സ് എലോൺ’ എന്നതാണ് ചിത്രത്തിന്റെ ടൈറ്റിൽ ടാഗ്‌ലൈൻ.

‘സീതാ രാമം’ എന്ന ഹിറ്റ് ചിത്രത്തിന് ശേഷം ഹനു രാഘവപുടി സംവിധാനം ചെയ്യുന്ന സിനിമയാണിത്. 1940-കളുടെ പശ്ചാത്തലത്തിൽ കഥ പറയുന്ന ബിഗ് ബജറ്റ് ചരിത്ര ചിത്രമായാണ് ‘ഫൗസി’ ഒരുങ്ങുന്നത്. കൊളോണിയൽ കാലഘട്ടത്തെ പശ്ചാത്തലമാക്കുന്ന ചിത്രത്തിൽ ‘ഓപ്പറേഷൻ Z’ എന്ന സൈനിക നീക്കത്തിനും പ്രാധാന്യമുണ്ടെന്നാണ് റിപ്പോർട്ടുകൾ.

1932 മുതൽ ബ്രിട്ടീഷ് ഭരണകൂടം തേടുന്ന മോസ്റ്റ് വാണ്ടഡ് കഥാപാത്രമായാണ് പ്രഭാസ് ചിത്രത്തിൽ എത്തുന്നതെന്നാണ് സൂചന. ഇമാൻവിയാണ് നായിക. അനുപം ഖേർ, മിഥുൻ ചക്രവർത്തി, ജയപ്രദ തുടങ്ങിയവരും പ്രധാന വേഷങ്ങളിലെത്തുന്നു.

തെലുങ്ക്, മലയാളം, തമിഴ്, ഹിന്ദി, കന്നഡ ഉൾപ്പെടെ ആറ് ഭാഷകളിലാണ് ചിത്രം പ്രദർശനത്തിനെത്തുക. സുദീപ് ചാറ്റർജി ഐ.എസ്.സി.യാണ് ഛായാഗ്രഹണം. വിശാൽ ചന്ദ്രശേഖറാണ് സംഗീതം ഒരുക്കുന്നത്. കോട്ടഗിരി വെങ്കിടേശ്വര റാവുവാണ് എഡിറ്റിംഗ് നിർവഹിക്കുന്നത്. ചിത്രത്തിന്റെ മറ്റ് സാങ്കേതിക പ്രവർത്തനങ്ങളും അന്താരാഷ്ട്ര നിലവാരത്തിലാണ് ഒരുക്കുന്നത്.

പ്രഭാസിന്റെ പുതിയ ഡിപിയിലൂടെ ‘ഫൗസി’യുടെ കഥാപാത്രത്തെ ഔദ്യോഗികമായി കൂടുതൽ ശ്രദ്ധയിൽപ്പെടുത്തുകയാണ് അണിയറപ്രവർത്തകർ. ഡിസംബർ മൂന്നിലെ റിലീസിനായി കാത്തിരിക്കുകയാണ് ആരാധകർ.