ഇന്ത്യൻ സംഗീതത്തിന്റെ ഇതിഹാസം!! ആശാ ഭോസ്‌ലെയുടെ നിര്യാണത്തിൽ അനുശോചിച്ച് പ്രധാനമന്ത്രി നരേന്ദ്രമോദി

ദില്ലി : ഇന്ത്യൻ സംഗീത ലോകത്തെ നിത്യവിസ്മയം ആശാ ഭോസ്‌ലെയുടെ വിയോഗത്തിൽ അഗാധമായ ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. ഭാരതം കണ്ട ഏറ്റവും സവിശേഷവും വൈവിധ്യമാർന്നതുമായ ശബ്ദങ്ങളിൽ ഒന്നായിരുന്നു ആശാ ഭോസ്‌ലെയുടേതെന്ന് പ്രധാനമന്ത്രി അനുസ്മരിച്ചു. എക്സിലൂടെ (X) പങ്കുവെച്ച കുറിപ്പിൽ, ദശകങ്ങൾ നീണ്ടുനിന്ന ആശാ ഭോസ്‌ലെയുടെ അസാധാരണമായ സംഗീതയാത്ര നമ്മുടെ സാംസ്കാരിക പൈതൃകത്തെ സമ്പന്നമാക്കിയെന്നും ലോകമെമ്പാടുമുള്ള ദശലക്ഷക്കണക്കിന് ഹൃദയങ്ങളെ സ്പർശിച്ചുവെന്നും അദ്ദേഹം പറഞ്ഞു.

ആശാ ഭോസ്‌ലെയുടെ ശബ്ദത്തിന് കാലാതീതമായ തിളക്കമുണ്ടായിരുന്നുവെന്ന് പ്രധാനമന്ത്രി കുറിച്ചു. വികാരനിർഭരമായ ഈണങ്ങളായാലും ഊർജ്ജസ്വലമായ രചനകളായാലും ആ ശബ്ദത്തിന്റെ പ്രഭാവം എടുത്തുപറയേണ്ടതാണ്. അവരുമായി നടത്തിയ കൂടിക്കാഴ്ചകൾ എപ്പോഴും വിലപ്പെട്ട ഓർമ്മകളായി സൂക്ഷിക്കുമെന്നും അദ്ദേഹം കൂട്ടിച്ചേർത്തു. അവരുടെ കുടുംബാംഗങ്ങളുടെയും ആരാധകരുടെയും ദുഃഖത്തിൽ പങ്കുചേരുന്നതായും വരുംതലമുറകൾക്ക് അവർ എന്നും ഒരു പ്രചോദനമായിരിക്കുമെന്നും മോദി വ്യക്തമാക്കി.

മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലിരിക്കെ വാർദ്ധക്യസഹജമായ അസുഖങ്ങളെത്തുടർന്നാണ് അന്തരിച്ചത്. നെഞ്ചിലെ അണുബാധയെത്തുടർന്ന് ശനിയാഴ്ച വൈകുന്നേരമാണ് അവരെ ആശുപത്രിയിൽ പ്രവേശിപ്പിച്ചത്. തിങ്കളാഴ്ച രാവിലെ 11 മണി മുതൽ മുംബൈയിലെ വസതിയിൽ പൊതുദർശനത്തിന് വെക്കുന്ന ഭൗതികദേഹം വൈകുന്നേരം 4 മണിക്ക് ശിവാജി പാർക്കിൽ പൂർണ്ണ ഔദ്യോഗിക ബഹുമതികളോടെ സംസ്കരിക്കും. 1943-ൽ തുടങ്ങിയ ആ സംഗീത യാത്ര എട്ട് പതിറ്റാണ്ടുകൾക്ക് ശേഷമാണ് അവസാനിക്കുന്നത്.