പ്രധാനമന്ത്രി നരേന്ദ്രമോദി ഡിസംബറിൽ അമേരിക്കയിലേക്ക്; ട്രമ്പ് -മോദി സൗഹൃദം സജീവമെന്ന് യുഎസ് അംബാസിഡർ

വാഷിംഗ്ടൺ : പ്രധാനമന്ത്രി നരേന്ദ്രമോദി ഈ വർഷം ഡിസംബറിൽ അമേരിക്ക സന്ദർശിക്കുമെന്ന് യു.എസ് ഇന്ത്യയിലെ അമേരിക്കൻ അംബാസഡർ സെർജിയോ ഗോർ . ഡിസംബറിൽ ഫ്ലോറിഡയിൽ നടക്കുന്ന ജി20 ഉച്ചകോടിയിൽ പങ്കെടുക്കാനാണ് പ്രധാനമന്ത്രി അമേരിക്കയിലെത്തുന്നത്. യുഎസ് വിദേശകാര്യ സെക്രട്ടറി മാർക്കോ റൂബിയോയുടെ സമീപകാല ഇന്ത്യൻ സന്ദർശനവേളയിൽ പ്രധാനമന്ത്രി മോദിയെ അദ്ദേഹം ഔദ്യോഗികമായി വൈറ്റ് ഹൗസിലേക്ക് ക്ഷണിച്ചിരുന്നു. യു.എസ്.ഐ.എസ്.പി.എഫ് ലീഡർഷിപ്പ് ഉച്ചകോടിക്കിടെ മാദ്ധ്യമങ്ങളോട് സംസാരിക്കവെയാണ് അംബാസഡർ ഇക്കാര്യം വെളിപ്പെടുത്തിയത് .

ഇന്ത്യയും അമേരിക്കയും തമ്മിലുള്ള ഇടക്കാല വ്യാപാര കരാർ വൈകാതെ തന്നെ യാഥാർത്ഥ്യമാകുമെന്ന ശുഭപ്രതീക്ഷയും സെർജിയോ ഗോർ പങ്കുവെച്ചു. ഇരുരാജ്യങ്ങളും തമ്മിൽ ആയിരക്കണക്കിന് ഉൽപ്പന്നങ്ങളുമായി ബന്ധപ്പെട്ട സങ്കീർണ്ണമായ നിയമപരമായ ചർച്ചകളാണ് നടക്കുന്നത്. യു.എസ് ട്രേഡ് റെപ്രസെന്റേറ്റീവ് ജാമിസൺ ഗ്രീറിന് മേൽ പ്രസിഡന്റ് ഡൊണാൾഡ് ട്രമ്പിന് പൂർണ്ണ വിശ്വാസമുണ്ടെന്നും കരാറിന്റെ അന്തിമ ഘട്ടത്തിലേക്ക് കാര്യങ്ങൾ നീങ്ങുകയാണെന്നും അദ്ദേഹം പറഞ്ഞു. പ്രസിഡന്റ് ട്രമ്പും പ്രധാനമന്ത്രി മോദിയും തമ്മിലുള്ള വ്യക്തിപരമായ സൗഹൃദത്തെക്കുറിച്ചും അംബാസഡർ ഓർമ്മിപ്പിച്ചു. ഒരിക്കൽ ഇന്ത്യയിൽ പുലർച്ചെ ആറ് മണിയായിരുന്ന സമയത്ത് പ്രധാനമന്ത്രി മോദിയെ വിളിക്കാൻ ട്രമ്പ് ആവശ്യപ്പെട്ടതായും, അദ്ദേഹം തന്നെപ്പോലെ ഉറക്കം കുറവുള്ള ആളായതിനാൽ ഈ സമയത്തും ഉണർന്നിരിപ്പുണ്ടാകുമെന്ന് ട്രമ്പ് പറഞ്ഞതായും അംബാസഡർ വ്യക്തമാക്കി.

ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ചരിത്രപരമായ മുന്നേറ്റത്തിലാണെന്ന് യു.എസ്.ഐ.എസ്.പി.എഫ് ഓണററി സീനിയർ അഡ്വൈസർ അൽ മേസണും വ്യക്തമാക്കി. ഇടക്കാലത്ത് വ്യാപാരരംഗത്തും ബ്യൂറോക്രാറ്റിക് തലത്തിലും ഉണ്ടായ ചില വെല്ലുവിളികളെ മറികടന്ന് ട്രമ്പ് -മോദി സൗഹൃദം വീണ്ടും ശക്തമാക്കാൻ അംബാസഡർ സെർജിയോ ഗോർ വലിയ പങ്കുവഹിച്ചതായി അദ്ദേഹം ചൂണ്ടിക്കാട്ടി. ഇന്ത്യയുടെ വളർച്ചയെ ട്രമ്പ് ബഹുമാനിക്കുന്നുണ്ടെന്നും മോദിയുടെ നേതൃപാടവത്തെ അദ്ദേഹം പ്രശംസിക്കുന്നുണ്ടെന്നും മേസൺ കൂട്ടിച്ചേർത്തു. വരാനിരിക്കുന്ന ക്വാഡ് ഉച്ചകോടിയെക്കുറിച്ചും പസഫിക് മേഖലയിലെ സുരക്ഷയെക്കുറിച്ചും ഇരുരാജ്യങ്ങളും തമ്മിലുള്ള വ്യാപാര പങ്കാളിത്തത്തെക്കുറിച്ചും ശുഭകരമായ സൂചനകളാണ് യു.എസ് വൃത്തങ്ങൾ നൽകുന്നത്.