സെൽഫിയെടുക്കാനെത്തിയ ആരാധകനെ തള്ളി പൃഥ്വി ഷാ; താരത്തിനെതിരെ ആക്രമണമുണ്ടായ ദിവസത്തെ സിസിടിവി ദൃശ്യങ്ങൾ പുറത്ത്

മുംബൈ : ആരാധന മൂത്ത് സെല്‍ഫിയെടുക്കാനെത്തിയ ആരാധകനോട് ക്രിക്കറ്റ് താരം പൃഥ്വി ഷാ ദേഷ്യപ്പെടുന്ന ദൃശ്യങ്ങൾ പുറത്ത് വന്നു. പൃഥ്വി ഷാ മർദിച്ചെന്നും അപമാനിച്ചെന്നുമുള്ള പരാതിയിൽ ഭോജ്പുരി നടിയും ഇൻഫ്ലുവൻസറുമായ സപ്ന ഗില്ലിന്റെ അഭിഭാഷകൻ തെളിവായി കോടതിയിൽ സമർപ്പിച്ച സിസിടിവി ദൃശ്യങ്ങളാണ് ഇപ്പോൾ സമൂഹ മാദ്ധ്യമങ്ങളി പ്രചരിക്കുന്നത്. മുംബൈയിലെ പബ്ബിൽനിന്നുള്ള സിസിടിവി ദൃശ്യങ്ങളാണിത്.

സെൽഫിയെടുക്കാനെത്തിയ യുവാവിനെ പൃഥ്വി ഷാ തള്ളിമാറ്റുന്നത് ദൃശ്യങ്ങളിൽ കാണാം. തർക്കം രൂക്ഷമായതോടെ യുവാവിനും കൂടെയുള്ളവർക്കുമെതിരെ പൃഥ്വി ഷാ തിരിഞ്ഞു. ഇതോടെ താരത്തെ സുഹൃത്തുക്കൾ പിടിച്ചുമാറ്റുന്നതും ദൃശ്യങ്ങളിലുണ്ട്.

പബ്ബിൽനിന്ന് ഇറങ്ങിയ പൃഥ്വി ഷായെയും സുഹൃത്തിനെയും സപ്ന ഗില്ലിന്റെ നേതൃത്വത്തിൽ ആളുകൾ വാഹനത്തിൽ പിന്തുടർന്ന് ആക്രമിച്ചെന്നാണ് താരത്തിന്റെ സുഹൃത്ത് പൊലീസിൽ നൽകിയിരിക്കുന്ന പരാതിയിൽ പറഞ്ഞിരിക്കുന്നത്. പരാതിയിൽ തൊട്ടടുത്ത ദിവസം തന്നെ സപ്ന ഗില്ലിനെ മുംബൈ പൊലീസ് അറസ്റ്റ് ചെയ്തു. പുറത്തിറങ്ങിയതിനു പിന്നാലെ പൃഥ്വി ഷായും സുഹൃത്തും ചേര്‍ന്ന് പൊതു സ്ഥലത്തുവച്ച് അപമാനിച്ചെന്നും ശാരീരികമായി ആക്രമിച്ചെന്നുമാരോപിച്ച് അന്ധേരി മജിസ്ട്രേറ്റ് കോടതിയില്‍ സപ്ന കേസ് ഫയൽ ചെയ്തു.ലൈംഗികാതിക്രമം തെളിയിക്കുന്നതിന് മെഡിക്കൽ രേഖകളും പരാതിക്കൊപ്പം നടി കോടതിയിൽ സമർപ്പിച്ചിരുന്നു. ഇതിന് പുറമേ താൻ പരാതി നൽകിയിട്ടും നടപടിയെടുക്കാതിരുന്ന എയർപോർട്ട് പൊലീസ് സ്റ്റേഷൻ ഉദ്യോഗസ്ഥർക്കെതിരെയും നടി കോടതിയെ സമീപിച്ചിട്ടുണ്ട്.

https://twitter.com/Sportslive91091/status/1674303176772825089?ref_src=twsrc%5Etfw