പുൽപള്ളി സർവീസ് സഹകരണ ബാങ്ക് വായ്പ തട്ടിപ്പ്; കെപിസിസി മുൻ ജനറൽ സെക്രട്ടറി കെ.കെ അബ്രഹാമിന്റേതടക്കം 4.34 കോടി രൂപയുടെ സ്വത്തുക്കൾ ഇഡി കണ്ടുകെട്ടി

വയനാട്: പുൽപള്ളി സർവീസ് സഹകരണ ബാങ്ക് വായ്പ തട്ടിപ്പ് കേസുമായി ബന്ധപ്പെട്ട് 4.34 കോടി രൂപയുടെ സ്വത്തുക്കൾ കണ്ടുകെട്ടി ഇഡി. ബാങ്കിന്റെ മുൻ പ്രസിഡന്റും കെപിസിസി മുൻ ജനറൽ സെക്രട്ടറിയുമായ കെ.കെ അബ്രാഹാമിന്റെയും മുൻ സെക്രട്ടറിയുടേയും മറ്റ് ബോർഡ് അംഗങ്ങളുടേയും സ്വത്തുക്കളാണ് ഇ ഡി കണ്ടുകെട്ടിയത്.

പുൽപള്ളി സർവീസ് സഹകരണ ബാങ്കിന്റെ മുൻഭരണസമിതിയുടെ കാലത്ത് കോടികളുടെ വായ്പത്തട്ടിപ്പ് നടത്തിയെന്ന പരാതിയുടെ അടിസ്ഥാനത്തിലാണ് ഇ ഡി അന്വേഷണം നടത്തുന്നത്. കേസിൽ ഒന്നാംപ്രതിയായ കെ.കെ അബ്രഹാമിനെ നേരത്തെ ഇ ഡി അറസ്റ്റ് ചെയ്തിരുന്നു. സഹകരണ വകുപ്പും വിജിലൻസും നടത്തിയ അന്വേഷണത്തിൽ ബാങ്കിൽ എട്ട് കോടിയിലേറെ രൂപയുടെ തട്ടിപ്പ് നടന്നതായി കണ്ടെത്തിയിരുന്നു. ഫെബ്രുവരിയിൽ നോട്ടീസ് നൽകി അന്വേഷണം തുടങ്ങിയിരുന്നെങ്കിലും വായ്പത്തട്ടിപ്പിനിരയായ കർഷകൻ കേളക്കവല കിഴക്കെ ഇടയിലാത്ത് രാജേന്ദ്രൻ നായർ ആത്മഹത്യ ചെയ്തതോടെയാണ് ഇ ഡി അന്വേഷണം ഊർജ്ജിതമാക്കിയത്.

കേസിൽ കെ.കെ അബ്രഹാമിനെ രണ്ടുദിവസത്തേക്ക് ജില്ല സെഷൻസ് കോടതി റിമാൻഡ് ചെയ്തിരുന്നു. തട്ടിപ്പിലെ മുഖ്യസൂത്രധാരൻ കെ.കെ. അബ്രഹാമാണെന്നും തട്ടിയ പണം ഇഞ്ചി കൃഷിയിലുൾപ്പെടെയാണ് നിക്ഷേപിച്ചതെന്നും ഇ ഡി അറിയിച്ചിരുന്നു. കസ്റ്റഡി അവസാനിച്ച നവംബർ 10-ന് കെ.കെ എബ്രഹാമിനെ പിഎംഎൽഎ കോടതിയിൽ ഹാജരാക്കുകയായിരുന്നു. കോടതി 14 ദിവസത്തേക്ക് റിമാന്റ് നീട്ടി.