കാടുകയറിയ നാട്ടാന പുതുപ്പള്ളി സാധുവിനെ കണ്ടെത്തി; അനുനയിപ്പിച്ച് തിരികെ കൊണ്ടുവരാൻ ശ്രമം; ആർ ആർ ടി സംഘം സ്ഥലത്ത് ക്യാമ്പ് ചെയ്യുന്നു

കോതമംഗലത്ത് നിന്നും മറ്റൊരു നാട്ടാനയുമായുള്ള സംഘർഷത്തെ തുടർന്ന് കാട്ടിലേക്ക് ഓടിപ്പോയ നാട്ടാന പുതുപ്പള്ളി സാധുവിനെ കണ്ടെത്തി. ആനയെ കണ്ടെത്താൻ മൂന്നാറിൽ നിന്നടക്കം ആർ ആർ ടി സംഘം സ്ഥലത്ത് എത്തിയിരുന്നു. ആനയ്ക്ക് കാര്യമായ പരിക്കുകളില്ല എന്ന് കണ്ടെത്തിയിട്ടുണ്ട്. ഭക്ഷണവും വെള്ളവും നൽകി അനുനയിപ്പിച്ച് തിരികെ കൊണ്ടുവരാൻ പാപ്പാന്മാർ സ്ഥലത്ത് എത്തിയിട്ടുണ്ട്. ഇന്നലെ വൈകുന്നേരം ആറരവരെ ആനയ്ക്കായി തെരച്ചിൽ നടത്തിയിരുന്നു. ഉൾക്കാട്ടിലേക്ക് കടന്നിട്ടുണ്ടാകാം എന്ന നിഗമനത്തിൽ ഇന്നലെ തെരച്ചിൽ നിർത്തിയിരുന്നു. ഇന്ന് രാവിലെ പുനരാരംഭിച്ച തെരച്ചിലിലാണ് ആനയെ കണ്ടെത്തിയത്,

ഇന്നലെ കോതമംഗലത്തെ ഒരു ഷൂട്ടിങ് ലൊക്കേഷനിൽ മറ്റൊരു നാട്ടാനയുമായി ഉണ്ടായ സംഘർഷത്തിനൊടുവിലാണ് പുതുപ്പള്ളി സാധു കാട്ടിലേക്ക് ഓടിയത്. മൂന്ന് പിടിയാനകളെയും രണ്ട് കൊമ്പനാനകളെയുമാണ് സിനിമ ചിത്രീകരണത്തിനായി കൊണ്ടുവന്നിരുന്നത്. ഇതിലെ മറ്റൊരു കൊമ്പനാനയുമായിട്ടാണ് സാധു കൊമ്പുകോർത്തത്.