അതിനിർണായകം ! ട്രമ്പുമായുള്ള കൂടിക്കാഴ്ചയുടെ വിവരങ്ങൾ മോദിയുമായി പങ്കുവെച്ച് പുടിൻ

ദില്ലി : യുക്രെയ്ൻ വിഷയത്തിൽ അമേരിക്കൻ പ്രസിഡന്റ് ഡൊണാൾഡ് ട്രമ്പുമായി അലാസ്‌കയിൽ വെച്ച് കൂടിക്കാഴ്ച നടത്തിയതിന് തൊട്ടുപിന്നാലെ പ്രധാനമന്ത്രി നരേന്ദ്രമോദിയുമായി ടെലഫോണിൽ സംസാരിച്ച് റഷ്യൻ പ്രസിഡന്റ് വ്ളാഡിമിർ പുടിൻ. കൂടിക്കാഴ്ചയിലെ വിലയിരുത്തലുകളും വിശദാംശങ്ങളും പങ്കുവെക്കുക എന്ന ലക്ഷ്യത്തോടെയാണ് പുതിൻ പ്രധാനമന്ത്രിയുമായി സംസാരിച്ചതെന്ന് ഔദ്യോഗിക വൃത്തങ്ങൾ അറിയിച്ചു.

നയതന്ത്രത്തിലൂടെയും ചർച്ചകളിലൂടെയും സംഘർഷത്തിന് സമാധാനപരമായ പരിഹാരം കണ്ടെത്തണമെന്ന ഭാരതത്തിന്റെ നിലപാട് നരേന്ദ്രമോദി ഈ സംഭാഷണത്തിൽ ആവർത്തിച്ചു. വിഷയത്തിൽ ഭാരതത്തിന്റെ പൂർണ പിന്തുണ പുടിന് ഉറപ്പ് നൽകുകയും ചെയ്തു. റഷ്യൻ പ്രസിഡന്റിന് നന്ദി രേഖപ്പെടുത്തിയ പ്രധാനമന്ത്രി, ഇരു രാജ്യങ്ങളും തമ്മിലുള്ള തന്ത്രപ്രധാനമായ പങ്കാളിത്തം ശക്തിപ്പെടുത്തുന്നതിനുള്ള ഉഭയകക്ഷി സഹകരണ വിഷയങ്ങളും ചർച്ച ചെയ്തു. ആറുവർഷത്തിനുശേഷമാണ് ട്രമ്പും പുതിനും തമ്മിൽ കൂടിക്കാഴ്ച നടത്തുന്നത്. യുക്രെയ്‌നിൽ സമാധാനം പുനഃസ്ഥാപിക്കുക എന്ന ലക്ഷ്യത്തോടെ അലാസ്‌കയിൽ മൂന്നുമണിക്കൂറോളമാണ് ഇരുവരും അടച്ചിട്ട മുറിയിൽ ചർച്ച നടത്തിയത്. ചർച്ചയിൽ അന്തിമ കരാറുകൾ രൂപപ്പെട്ടില്ലെങ്കിലും വലിയ പുരോഗതിയുണ്ടായെന്ന് ട്രമ്പ് പിന്നീട് അറിയിച്ചു.

ചർച്ചയുടെ കൂടുതൽ വിവരങ്ങൾ ഇരുനേതാക്കളും വെളിപ്പെടുത്തിയിട്ടില്ല. അമേരിക്കൻ വിദേശകാര്യ സെക്രട്ടറി മാർക്കോ റുബിയോ, പ്രത്യേക പ്രതിനിധി സ്റ്റീവ് വിറ്റ്‌കോഫ് എന്നിവരും പുടിനൊപ്പം വിദേശകാര്യ മന്ത്രി സെർഗെയി ലാവ്‌റോവും ചർച്ചയിൽ പങ്കെടുത്തു. ട്രമ്പ് -പുടിൻ കൂടിക്കാഴ്ചയുടെ വിവരങ്ങൾ ഉടൻതന്നെ പ്രധാനമന്ത്രിയെ അറിയിച്ചതിലൂടെ, ആഗോള വിഷയങ്ങളിൽ ഭാരതത്തിന്റെ നിലപാടുകൾക്ക് റഷ്യ നൽകുന്ന പ്രാധാന്യം വ്യക്തമാക്കുന്നതായി വിലയിരുത്തപ്പെടുന്നു.