റാഗിങ്ങിന്റെ പേരിൽ വിദ്യാർത്ഥികളെ ക്രൂരമായി മർദ്ദിച്ച സംഭവം; മലപ്പുറത്ത് അഞ്ച് സീനിയർ വിദ്യാർത്ഥികൾ അറസ്റ്റിൽ

മലപ്പുറം: മലപ്പുറത്ത് റാഗിങ്ങിന്റെ (Ragging In Malappuram) പേരിൽ വിദ്യാർത്ഥികളെ ക്രൂരമായി മർദ്ദിച്ച സംഭവത്തിൽ അഞ്ച് സീനിയർ വിദ്യാർത്ഥികൾ അറസ്റ്റിൽ. റാഗിങിന്റെ പേരിൽ വിദ്യാർത്ഥികളെ മർദ്ദിക്കുന്ന വീഡിയോ സമൂഹ മാധ്യമങ്ങളിൽ വ്യാപകമായി പ്രചരിച്ചിരുന്നു. ഇതിനെത്തുടർന്നാണ് പോലീസ് പ്രതികളെ പിടികൂടിയത്.

ചങ്ങരംകുളം അസ്സബാഹ് കോളേജിൽ കഴിഞ്ഞ ദിവസമാണ് സീനിയർ വിദ്യാർത്ഥികൾ ജൂനിയേഴ്സിനെ റാഗിങ്ങ് ചെയ്തത്. കോളേജിന് സമീപത്തെ റോഡിൽ വെച്ചാണ് ആക്രമണമുണ്ടായത്. സംഭവത്തിൽ മർദ്ദനത്തിനിരയായ ഒരു വിദ്യാർത്ഥിയുടെ പിതാവ് പോലീസിന് പരാതി നൽകിയിരുന്നു. വീഡിയോ കേന്ദ്രീകരിച്ച് പോലീസ് നടത്തിയ അന്വേഷണത്തിൽ അക്രമം നടത്തിയ വിദ്യാർത്ഥികളെ തിരിച്ചറിയുകയായിരുന്നു. ചങ്ങരംകുളം എസ്‌ഐയുടെ നേതൃത്വത്തിലുള്ള അന്വേഷണ സംഘം അഞ്ച് പേരുടെയും അറസ്റ്റ് രേഖപ്പെടുത്തി.