മാനനഷ്ടക്കേസുകൾ വിനയാകുന്നു; ജാർഖണ്ഡിലും മൂന്നു കേസ്സുകൾ; നേരിട്ട് ഹാജരാകുന്നതിൽ നിന്നും ഒഴിവാക്കാൻ സമർപ്പിച്ച രാഹുലിന്റെ ഹർജി ഇന്ന് ഹൈക്കോടതി പരിഗണിക്കും

ദില്ലി: കർണ്ണാടകയിൽ നടത്തിയ ‘മോദി’ പരാമർശത്തിൽ രാഹുൽ ഗാന്ധിക്ക് തലവേദനയേറുന്നു. ഗുജറാത്തിലെയും ബീഹാറിലെയും കേസുകൾക്ക് പുറമെ ജാർഖണ്ഡിലും രാഹുൽ ഗാന്ധിക്കെതിരെ മൂന്നു കേസ്സുകൾ നേരത്തെ രജിസ്റ്റർ ചെയ്തിരുന്നു. ഈ കേസ്സുകളിൽ നേരിട്ട് ഹാജരാകുന്നതിൽ നിന്ന് തന്നെ ഒഴിവാക്കണമെന്ന് ആവശ്യപ്പെട്ട് ജാർഖണ്ഡ് ഹൈക്കോടതിയിൽ രാഹുൽ സമർപ്പിച്ച ഹർജി ഇന്ന് പരിഗണിക്കും. മെയ് 22 ന് റാഞ്ചിയിലെ പ്രത്യേക എംപി/എംഎൽഎ കോടതിയിൽ നടക്കുന്ന വിചാരണയ്ക്കായി ഗാന്ധി കോടതിയിൽ നേരിട്ട് ഹാജരാകേണ്ടതായിരുന്നു.

2019ൽ കർണാടകയിലെ കോലാറിൽ നടന്ന പൊതു റാലിയിൽ രാഹുൽ ഗാന്ധി നടത്തിയ പരാമർശത്തെ തുടർന്ന് അഭിഭാഷകനായ പ്രദീപ് മോദി റാഞ്ചിയിൽ പരാതി നൽകിയിരുന്നു. ലോക്‌സഭാ തെരഞ്ഞെടുപ്പിന്റെ പ്രചാരണത്തിനിടെ, “നീരവ് മോദി, ലളിത് മോദി, നരേന്ദ്ര മോദി.. അവർക്കെല്ലാം എങ്ങനെയാണ് മോദി എന്ന പൊതുനാമം ഉണ്ടായത്? എല്ലാ കള്ളന്മാർക്കും എങ്ങനെയാണ് മോദി എന്ന പൊതുനാമം ഉണ്ടായത്?” എന്ന രാഹുലിന്റെ പരാമർശമാണ് വിവാദം സൃഷ്ടിച്ചത്.

പരാമർശം മോദിയുടെ കുടുംബപ്പേരുള്ള എല്ലാ വ്യക്തികൾക്കും എതിരാണെന്നും അവഹേളനപരവും അപകീർത്തികരവുമാണെന്നും പരാതിക്കാരൻ ആരോപിച്ചു. ഹരജിക്കാരൻ കോൺഗ്രസ് നേതാവിനെതിരെ മാനനഷ്ടക്കേസും നൽകിയിരുന്നു. ജാർഖണ്ഡിൽ ചൈബാസയിലും റാഞ്ചിയിലുമായി രാഹുലിനെതിരെ മൂന്ന് മാനനഷ്ടക്കേസുകൾ നിലവിലുണ്ട്. അതേസമയം ബി.ജെ.പി എം.എൽ.എയും മുൻ ഗുജറാത്ത് മന്ത്രിയുമായ പൂർണേഷ് മോദി നൽകിയ പരാതിയെത്തുടർന്ന് ഈ വർഷം ആദ്യം ഗുജറാത്ത് കോടതി ‘മോദി കുടുംബപ്പേര് പരാമർശം’ സംബന്ധിച്ച മാനനഷ്ടക്കേസിൽ രാഹുൽ ഗാന്ധിയെ കുറ്റക്കാരനാണെന്ന് കണ്ടെത്തുകയും ശിക്ഷ വിധിക്കുകയും ചെയ്തിരുന്നു. ഈ വിധിയുടെ അടിസ്ഥാനത്തിൽ എം പി സ്ഥാനത്ത് നിന്ന് രാഹുൽ അയോഗ്യനാക്കപ്പെടുകയും ചെയ്തിരുന്നു.