പാക്കിസ്ഥാന് വീണ്ടും മുന്നറിയിപ്പ് നല്‍കി രാജ്‌നാഥ് സിംഗ്: ‘ഗില്‍ഗിറ്റും പി ഒ കെയും ഇന്ത്യയുടെ ഭാഗം’; ലേയില്‍ പ്രതിരോധമന്ത്രിയ്ക്ക് ഉജ്ജ്വല വരവേല്‍പ്

ലഡാക്ക്: പാക് അധീന കശ്മീര്‍ (പി ഒ കെ) ഇന്ത്യയുടെ ഭാഗമെന്ന വാദം ആവര്‍ത്തിച്ച് കേന്ദ്ര പ്രതിരോധമന്ത്രി രാജ്‌നാഥ് സിംഗ്. നേരത്തെ ഭരണഘടനയുടെ 370ാം അനുച്ഛേദം റദ്ദാക്കിയതിന് പിറകെ പാകിസ്താന്‍ കൈവശം വച്ചിരിക്കുന്ന കശ്മീരും ഇന്ത്യയുടെ ഭാഗമാണെന്ന് രാജ്‌നാഥ് സിംഗ് പറഞ്ഞിരുന്നു. സ്വന്തം നാട്ടിലെ ഭീകരത അമര്‍ച്ച ചെയ്യാനാണ് പാക്കിസ്ഥാന്‍ ശ്രമിക്കേണ്ടതെന്നും അദ്ദേഹം കൂട്ടിച്ചേര്‍ത്തു. ലഡാക് സന്ദര്‍ശനവേളയില്‍ സംസാരിക്കുകയായിരുന്നു കേന്ദ്ര പ്രതിരോധമന്ത്രി.

“കശ്മീരില്‍ യാതൊരു അവകാശവും പാക്കിസ്ഥാനില്ല, ഗില്‍ഗിറ്റും പി ഒ കെയും ഇന്ത്യയുടെ ഭാഗമാണ്” അദ്ദേഹം പറഞ്ഞു. 370ാം വകുപ്പ് എടുത്തുകളയുക എന്നത് ഞങ്ങളുടെ ബാധ്യതയായിരുന്നു. അത് പെട്ടെന്ന് എടുത്ത ഒരു തീരുമാനമല്ല. ജനസംഘം രൂപീകരിച്ചത് മുതല്‍ ഇക്കാര്യം പറയുന്നതാണെന്നും പ്രതിരോധമന്ത്രി പറഞ്ഞു.

ലേയിലെ കിസാന്‍ ജവാന്‍ വിജയ് മേളയില്‍ പങ്കെടുക്കുന്നതിനായാണ് രാജ്‌നാഥ് സിംഗ് ലഡാക്കില്‍ എത്തിയത്. ലഡാക് കേന്ദ്ര ഭരണപ്രദേശമാക്കിയതിന് ശേഷമുള്ള പ്രതിരോധമന്ത്രിയുടെ ആദ്യസന്ദര്‍ശനമാണ് ഇത്. ഊഷ്മള വരവേല്‍പാണ് ലേയിലെ ജനങ്ങള്‍ രാജ്‌നാഥ് സിംഗിന് നല്‍കിയത്.