തെലുങ്ക് സൂപ്പർ താരം മഹേഷ് ബാബുവിന്റെ സഹോദരനും മുന്‍കാലനടനും നിർമ്മാതാവുമായ രമേഷ് ബാബു അന്തരിച്ചു

ഹൈദരാബാദ്: തെലുങ്കിലെ ആദ്യകാലനടനും നിർമ്മാതാവുമായ രമേഷ് ബാബു അന്തരിച്ചു. 56 വയസ്സായിരുന്നു. കരള്‍രോഗത്തെ തുടര്‍ന്ന് ഹൈദരാബാദിലെ സ്വകാര്യ ആശുപത്രിയില്‍ വച്ചായിരുന്നു അദ്ദേഹത്തിന്റെ അന്ത്യം.

നിര്‍മാതാവും സംവിധായകനും നടനുമായ ഖട്ടമനേനി ശിവരാമകൃഷ്ണയുടെയും ഇന്ദിരാദേവിയുടെയും മൂത്ത മകനാണ് രമേഷ് ബാബു. പ്രശസ്ത തെലുങ്ക് നടന്‍ മഹേഷ് ബാബു അദ്ദേഹത്തിന്റെ സഹോദരനാണ്.

1974ല്‍ അല്ലൂരി സീതാരാമരാജു എന്ന ചിത്രത്തിലൂടെ ബാലതാരമായാണ് രമേഷ് ബാബു സിനിമയിലെത്തിയത്.

തുടർന്ന് 1987ല്‍ പുറത്തിറങ്ങിയ സാമ്രാട്ടിലൂടെയാണ് നായകനായി അരങ്ങേറ്റം കുറിച്ചു. 1997 ല്‍ പുറത്തിറങ്ങിയ എന്‍കൗണ്ടറിലാണ് ഏറ്റവുമൊടുവില്‍ അഭിനയിച്ചത്.

എന്നാൽ പിന്നീട് അഭിനയരംഗത്ത് നിന്ന് പിന്മാറിയ രമേഷ് ബാബു നിര്‍മാണ രംഗത്ത് സജീവമായി സൂര്യവംശം എന്ന ബോളിവുഡ് ചിത്രത്തിലൂടെ തുടക്കം കുറിച്ചു.

അര്‍ജുന്‍, അതിഥി, ആഗഡു എന്നിവയാണ് രമേഷ് ബാബു നിര്‍മിച്ച ചിത്രങ്ങള്‍. മൃദുലയാണ് രമേഷ് ബാബുവിന്റെ ഭാര്യ.