റീൽ ലൈഫ് അല്ല അജാസേ റിയൽ ലൈഫ് !! മഹാരാഷ്ട്ര നിയമസഭാ തെരഞ്ഞെടുപ്പിൽ മത്സരിച്ച ബിഗ് ബോസ് താരത്തിന് പടുകൂറ്റൻ തോൽവി ! 5.6 മില്യൺ ഇൻസ്റ്റാഗ്രാം ഫോളോവേഴ്‌സുള്ള അജാസ് ഖാന് ലഭിച്ചത് 103 വോട്ടുകൾ മാത്രം

മഹാരാഷ്ട്ര നിയമസഭാ തെരഞ്ഞെടുപ്പിൽ മത്സരിച്ച ബിഗ് ബോസ് താരവും സോഷ്യൽ മീഡിയ താരവുമായ അജാസ് ഖാന് പടുകൂറ്റൻ തോൽവി. വെർസോവ മണ്ഡലത്തിൽ നിന്ന് ജനവിധി തേടിയ അജാസ് ഖാന് 103 വോട്ടുകൾ മാത്രമേ നേടാനായുള്ളൂ. 5.6 ദശലക്ഷത്തിലധികം ഇൻസ്റ്റാഗ്രാം ഫോളോവേഴ്‌സുള്ള താരമാണ് അജാസ് ഖാൻ. വെർസോവ മണ്ഡലത്തിൽ നോട്ടയ്ക്ക് പോലും 747 വോട്ട് ലഭിച്ചപ്പോഴാണ് ബിഗ് ബോസ് താരത്തിന്റെ ദയനീയ പ്രകടനം.

പരമ്പരാഗതമായി കോൺഗ്രസ് ശക്തികേന്ദ്രമായിരുന്ന വെർസോവ സീറ്റിൽ നിന്ന് 16 സ്ഥാനാർത്ഥികളാണ് മത്സരരംഗത്തുണ്ടായിരുന്നത്. ആസാദ് സമാജ് പാർട്ടി (കാൻഷി റാം) ടിക്കറ്റിലാണ് അജാസ് ഖാൻ മത്സരിച്ചത്. ഗുജറാത്തിലെ അഹമ്മദാബാദിൽ ജനിച്ച അദ്ദേഹം ദിയ ഔർ ബാത്തി ഹം, കരം അപ്നാ അപ്നാ തുടങ്ങിയ ഷോകളിലൂടെ പ്രശസ്തനായ ടെലിവിഷൻ നടനാണ്. രക്ത ചരിത്ര, അല്ലാ കെ ബന്ദേ തുടങ്ങിയ സിനിമകളിലും അദ്ദേഹം അഭിനയിച്ചിട്ടുണ്ട്.